Հայտնի ռուս գրողը կոչ է անում «ամպուտինացիա» սկսել

Ռուս հայտնի գրող Բորիս Ակունինը, որի գրքերը հարյուր հազարավոր տիրաժներով տարածվել են Ռուսաստանում և աշխարհում, կոչ է արել արշավ սկսել` ի պաշտպանություն Միխայիլ Խոդորկովսկու և Պլատոն Լեբեդևի:
LiveJournal-ի իր բլոգում Ակունինը կոչ է արել ինտերնետ հասարակությանը «կայք բացել անիրավ դատավորների դեմ», շարունակել ստորագրություններ հավաքել ՅՈՒԿՈՍ-ի նախկին ղեկավարների համար և մշակույթի հայտնի գործիչներին կոչ անել նամակով դիմել Ռուսաստանի նախագահին:
«Ազատություն» ռադիոկայանի ռուսական խմբագրությանը տված հարցազրույցում նա նշել է, որ դա իր անձնական ծրագիրը չէ, ինքը հավաքել է գաղափարները և դիմել իր ընթերցողներին:
Որպես բարեփոխումների իրականացման ամենաարագ քայլ նա համարում է Ռուսաստանի «ամպուտինացիան» (ամպուտացիային համահունչ բառ է ընտրել.– 1in.am): Եվ որքան շուտ այդ քայլը կատարվի, այնքան ավելի արագ կսկսեն լուծվել շատ բարդ խնդիրներ, որոնց առաջ կանգնած է Ռուսաստանը` կաշառակերություն, Կովկաս, ներդրումներ, արդիականացում, միջազգային վարկ:
Իսկ որպես պայքարի լավագույն միջոց՝ նա կոչ է անում անընդհատ գրել և բարձրաձայնել այս խնդիրների մասին: Այս քայլը նա բավականին արդյունավետ է համարում: