Թուրքական Haber Türk թերթի փոխանցմամբ՝ Վատիկանը սկսում է իր արխիվային գաղտնի փաստաթղթերի հրապարակումը: Ցայժմ չհրապարապարակված այդ փաստաթղթերը հիմնականում առնչվում են վերջին 400 տարիներին՝ սկսած 1621 թվականից: Ամենահին փաստաթուղթն առնչվում է 8-րդ դարին:
Վատիկանի արխիվների պատասխանատու մոնսենյոր Սերջիո Պագանոն հայտարարել է, որ այդ փաստաթղթերում կան հայերի մասին բազմաթիվ տեղեկություններ: Հայոց ցեղասպանությանն առնչվող փաստաթղթերի առնչությամբ Պագանոն նշել է, որ դրանք անհավատալի փաստաթղթեր են, որոնցում պատկերված են թուրք զինվորների անտանելի դաժանությունն ու անխղճությունը։
Հիշեցնենք, որ ավելի վաղ Սերջիո Պագանոն հայտնել էր, որ 1894-1897 թվականներին առնչվող փաստաթղթերից մեկում նշված է, որ 1896 թվականին Հռոմի պապ Լեո 13-ը սուլթան Աբդուլ Համիդ 2-րդին կոչ է արել գթասրտություն ցուցաբերել և դադարեցնել հայերի կոտորածները։
Ի դեպ, նախորդ տարվա հուլիսի կեսերին հայտնի դարձավ, որ Վատիկանը պլանավորում է մոտ ժամանակներս հրապարակել Օսմանյան կայսրությունում իրականացված Հայոց ցեղասպանության մասին առանձին գիրք։ Գրքում ներկայացվելու է նաև Հայոց ցեղասպանությանն առնչվող՝ Վատիկանի ու Թուրքիայի կաթոլիկ գործիչների նամակագրությունը։
Բացի այդ, գրքում տեղ են գտնելու թուրք զինվորների բազմաթիվ դաժանությունների մասին փաստեր։ Վատիկանի ռադիոյի տվյալներով՝ գրքում ներկայացվելու է 1914-1922 թվականներին Հռոմի պապ Բենեդիկտոս 15-րդի և օսմանյան սուլթանի միջև նամակագրությունը։
