ԱՄՆ նախագահ Բարաք Օբաման հանդես է եկել նախազգուշական ելույթով, կոչ անելով Հարավային Սուդանում տեղի ունեցող ինքնորոշման հանրաքվեի շահագրգռված բոլոր կողմերին զերծ մնալ սադրիչ գործողություններից: «Ինձ շատ է ուրախացնում այն հանգամանքը, որ քվեարկությունը Սուդանում սկսվել է,- նշվում է Սպիտակ տան տարածած հայտարարության մեջ,- և ուզում եմ շնորհավորել Հարավային Սուդանին, քանի որ իրենք են որոշում իրենց ապագան»:
Օբամայի խոսքերով, հանրաքվեն պատմական քայլ է Աֆրիկայի ամենամեծ երկրում խաղաղ համաձայնության ձգձգված գործընթացի համար, որը տեղի է ունեցել 2005 թ., և որը վերջ է դրել հյուսիսի և հարավի միջև քաղաքացիական պատերազմին:
«Միջազգային հանրությունը հստակ տրամադրված է, որպեսզի ապահովի երկու կողմերի ստանձնած պարտավորությունների կատարումը,- նշել է ԱՄՆ նախագահը։– Մենք գիտենք, որ այնտեղ ուժեր կան, որոնք փորձելու են շեղել քվեարկության ընթացքը: Ընտրողներին պետք է հնարավորություն ընձեռվի ներկայանալ տեղամասեր: Բոլոր կողմերը պետք է զերծ մնան սադրիչ հայտարարություններից, որոնք կարող են սրել իրավիճակը: Այս շրջանում բռնությունը պետք է վերացնել»:
The New York Times-ում կիրակի օրը հրապարակված իր հոդվածում Բարաք Օբաման նշում է, որ եթե Սուդանի նախագահ Օմար ալ Բաշիրը ճանաչի հանրաքվեի արդյունքները և բռնությունների չգնա, ապա Վաշինգտոնը կկարգավորի հարաբերությունները Խարտումի հետ: Ամերիկյան ադմինիստրացիայի ղեկավարի խոսքերով, Սուդանը կարող է դուրս գալ ԱՄՆ պետդեպարտամենտի երկրների այն ցուցակից, որոնք աջակցում են ահաբեկիչներին, կհանեն նաև տնտեսության վրա դրված արգելքները: «Իսկ նրանք, ովքեր կչարաշահեն իրենց վերցրած միջազգային պարտավորությունները, կենթարկվեն ավելի մեծ ճնշումների և մեկուսացման»,- նշել է Օբաման:
Հանրաքվեն կարող է բաժանել Հյուսիսը Հարավից և ստեղծել նոր պետություն: Ինչպես նշում է ИТАР-ТАСС գործակալությունը, միայն վերջին 20 տարիների ընթացքում քաղաքացիական պատերազմի ընթացքում մահացել է ավելի քան 2 մլն մարդ: Հանրաքվեն, որի արդյունքում կարող է կիսվել ամենամեծ տարածք ունեցող աֆրիկյան պետությունը, տեղի է ունենում Հարավային Սուդանի 10 ինքնավար նահանգներում, ինչպես և երկրի հյուսիսում, նաև՝ 8 արտասահմանյան երկրներում, որտեղ ապրում են այս երկրի հպատակները: Հանրաքվեն, որը կձգվի մինչև հունվարի 15-ը, կորոշի` կհայտնվի՞ աշխարհի քաղաքական քարտեզի վրա 193-րդ պետությունը, թե՞ Սուդանը կմնա միասնական: