Եգիպտոսում Ընտրական հանձնաժողովը հրապարակել է խորհրդարանի Վերին պալատի ընտրությունների արդյունքները: Ըստ «Ազատություն» ռադիոկայան` ընտրություններում հաղթող է ճանաչվել «Ազատություն և արդարություն» կուսակցությունը, «Մուսուլման եղբայրներ» իսլամիստական շարժման քաղաքական թևը` հավաքելով ձայների 58%-ը:
Ըստ տվյալների` «Ազատություն և արդարություն» կուսակցությունը 180 տեղից ստացել է 105-ը: Իսլամիստ-սալաֆիստների ուլտրապահպանողական «Ան-Նուռ» կուսակցությունը, ըստ արդյունքների, երկրորդ տեղում է`ստանալով 45, իսկ «Վաֆդ» լիբերալ կուսակցությունը`14 տեղ:
Ընտրությունները տեղի են ունեցել փետրվարի 22-ին: Այս էտապում եգիպտական խորհրդարանի Վերին պալատի հիմնական պարտականությունը հանձնաժողով ձևավորելն է, որը կզբաղվի երկրի սահմանադրության ստեղծմամբ:
Այս կերպ «Մուսուլման եղբայրներն» ամրապնդեցին իրենց դիրքերը` որպես երկրում առավել ազդեցիկ քաղաքական ուժ:
Հիշեցնենք, որ Հոսնի Մուբարաքի նախագահության ժամանակ այս կուսակցությունն արգելված էր:
