«Չենք լռելու»-ն շարունակելու է հանդես գալ բանակային բացահայտումներով: Այս մասին «Առաջին լրատվական»-ի հետ զրույցում տեղեկացրեց «Չենք լռելու» նախաձեռնության անդամ Տիգրան Ալեքսանյանը` խոսելով վերջին շրջանում նախաձեռնության գործունեության շուրջ:
Նա նշեց, որ բանակում տեղի ունեցող յուրաքանչյուր դեպք դատապարտվում է նախաձեռնության կողմից: «Վերջին դեպքերը մենք չենք հայտնաբերել, ուստի իմաստ չգտանք առանձին անդրադառնալ այդ դեպքերին: Մենք նաև վերջերս տեսանյութ էինք պատրաստել այն մասին, որ նախագահական նստավայրի մոտ ոստիկանը ճմռթել էր մահացած զինծառայողի մոր ձեռքի նկարը»,- նշեց Տ. Ալեքսանյանը` հավելելով, որ բանակում դեպքերը փորձում են բացահայտել իրենց անձնական շփումների միջոցով, բայց դեռ բարձրաձայնման արժանի դեպքեր չեն արձանագրել: Տ. Ալեքսանյանի տեղեկացմամբ` մոտ ապագայում կլինի տեսանյութ զորամասերից մեկում խայտառակ վիճակի վերաբերյալ:
Անդրադառնալով «Չենք լռելու»-ի զորամասերում դիտորդություն իրականացնելուն` նա ասաց, որ Վ. Գասպարյանը նախաձեռնությանն արտոնել էր լինել զորամասերում և արձանագրել դեպքեր: Ըստ Տ. Ալեքսանյանի` այդ ժամանակահատվածը 20 օր տևեց և շատ արդյունավետ էր: «Ցավոք, Հայաստանում Պաշտպանության նախարարությունը և բոլոր համակարգերը հիմնված են անձերի վրա: Վլադիմիր Գասպարյանի ոստիկանապետ դառնալուց հետո պայմանավորվածությունը չեղյալ համարվեց: Այդ ընթացքում`20 օր, մենք մի քանի զորամաս այցելեցինք և մի քանի բացահայտում արեցինք, որոշ սպաներ պատժվեցին»,- մեկնաբանեց ակտիվիստը:
Անդրադառնալով Հրազդանի ընտրություններից անմիջապես հետո համացանցում հայտնված տեսանյութին` Տ. Ալեքսանյանը նշեց, որ իրենց Հրազդանի համակիրներն էին զանգահարել, ասելով, որ համացանցում նման բան է հայտնվել և խնդրել էին տեղադրել «Չենք լռելու»-ի յութուբյան ալիքում:
