Թուրքական Dünya Bülteni կայքի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցությունն իր գործողություններում 50 տոկոսով ավելացրել է «քար նետող երեխաների» քանակը:
Այդ մասին են վկայում Թուրքիայի 15 նահանգներում անցկացված հետազոտության արդյունքները: Դրանք վկայում են, որ PKK-ն իր գործողություններում հիմնականում ներգրավում է 16-17 տարեկաններին: PKK-ն քուրդ անչափահասներին ամենաշատն օգտագործում է Հաքքարի ու Շըրնաք նահանգներում՝ նրանց ներգրավելով փոքր ակցիաներում՝ մոլոտովյան կոկտեյլներով ավտոմեքենաներ հրկիզելու համար:
Հիշեցնենք, որ Թուրքիայում բազմաթիվ քուրդ երեխաներ «Քար նետող երեխաների» մասին օրենքով դատապարտվել են «ահաբեկչական կազմակերպության» (PKK) անդամ հանդիսանալու կամ «ահաբեկչական կազմակերպության օգտին քարոզչություն իրականացնելու» համար:
Թուրքիայի արդարադատության նախարարության տվյալներով՝ 2006-2010 թվականներին Թուրքիայում «Ահաբեկչության դեմ պայքարի» օրենքի շրջանակներում ձերբակալվել է 12-18 տարեկան 4,000 քուրդ երեխա (այդ թվում` նաև աղջիկներ):
Ի դեպ, շատ դեպքերում ձերբակալված քուրդ երեխաների դատավճիռն առավել խիստ է ստացվում, քան, ասենք, քուրդ զինյալինը: Դրանով թուրքական իշխանությունները փորձում են քուրդ երեխաներին հեռու պահել իրենց դեմ պայքարին մասնակցելուց, սակայն ապարդյուն:
