Վիետնամի ԱԳ նախարար Ֆամ Բին Մինի հրավերով պաշտոնական այցելությամբ Հանոյում գտնվող Էդվարդ Նալբանդյանին փետրվարի 24-ին ընդունել է Վիետնամի Սոցիալիստական Հանրապետության Նախագահ Թրուոնգ Թան Սանգը:Այս մասին «Առաջին լրատվական»-ին տեղեկացրել է ԱԳՆ մամլո ծառայությունից:
Ողջունելով Հայաստանի արտգործնախարարին՝ Վիետնամի Նախագահն ասել է, որ Վիետնամում Հայաստանին և հայ ժողովրդին վերաբերվում են եղբայրական ջերմուրթյամբ, ինչն առաջին հերթին պայմանավորված է պատերազմի տարիներին և հետպատերազմյան վերականգնմանը Վիետնամին ցուցաբերած կարևոր աջակցությամբ: «Մեր շատ քաղաքացիներ կրթվել են Հայաստանում և այժմ իրենց գիտելիքները ներդնում են մեր երկրի զարգացման գործում և Վիետնամի ժողովուրդը երախտապարտ է Հայաստանին այդ օժանդակության համար: Այսօր մենք կարևորում ենք անկախ Հայաստանի հետ հարաբերությունների զարգացումը և ցանկանում ենք համապատասխան քայլեր ձեռնարկել այդ ուղղությամբ»:
Վիետնամի Նախագահը վերահաստատել է ՀՀ Նախագահին ուղղված Հանոյ այցելելու հրավերը և ընդգծեց, որ ինքն ուրախ կլինի ողջունել բարեկամ Հայաստանի ղեկավարին Վիետնամում:
Շնորհակալություն հայտնելով ընդունելության և ջերմ խոսքերի համար՝ Էդվարդ Նալբանդյանը Հայաստանի Նախագահի ողջույններն ու բարեմաղթանքները փոխանցել է Վիետնամի ղեկավարին, և տեղեկացրել, որ Նախագահ Սարգսյանն ընդունել է Վիետնամ այցելելու իր գործընկերոջ հրավերը և այն տեղի կունենա այս տարվա առաջին կեսին:
Երկուստեք վստահություն է հայտնվել, որ ՀՀ Նախագահի առաջիկա այցելությունը նոր լիցք կհաղորդի երկու բարեկամ երկրների հարաբերությունների զարգացմանը:
Վիետնամի Նախագահն ու Հայաստանի արտգործնախարարը հանգամանալից քննարկեցին երկկողմ հարաբերությունների խթանման նպատակով իրականացվելիք քայլերը, ասիական տարածաշրջանում տեղի ունեցող ինտեգրացիոն գործընթացները: Այս ենթատեքստում Վիետնամի Նախագահը նշեց, որ հաշվի առնելով երկու երկրների բարեկամական հարաբերությունները՝ իր երկիրը կարող է Հայաստանի համար դեպի Ասիական-խաղաղօվկիանոսյան տարածաշրջան դարպաս հանդիսանալ:
Նույն օրը Էդվարդ Նալբանդյանն այցելել է Վիետնամի Սոցիալիստական Հանրապետության հիմնադիր Հո Շի-մինի դամբարան և ծաղկեպսակ դրեց դամբարանին: Նախարար Նալբանդյանը նաև հարգանքի տուրք մատուցեց Վիետնամի անկախության և ազատության համար զոհվածների հիշատակին:
Հանոյում տեղի են ունեցել Հայաստանի և Վիետնամի արտաքին քաղաքական գերատեսչությունների ղեկավարներ Էդվարդ Նալբանդյանի և Ֆամ Բին Մինի բանակցությունները, որոնց ընթացքում անդրադարձ կատարվեց երկկողմ հարաբերությունների զարգացման հարցերին, մտքեր փոխանակվեցին տարածաշրջանային և միջազգային խնդիրների և դրանց լուծման ուղիների շուրջ:
Անդրադառնալով հայ-վիետնամական հարաբերություններին՝ Էդվարդ Նալբանդյանը նշեց, որ խորհրդային տարիներին Հայաստանում ուսում ստացած հազարավոր վիետնամցիները և Վիետնամում աշխատած հայերը յուրահատուկ թելերով կապում են երկու երկրներին և ժողովուրդներին:
Էդվարդ Նալբանդյանն ու Ֆամ Բին Մինը համակարծիք էին, որ դիվանագիտական հարաբերությունների հաստատման քսանամյակը բեկումնային պետք է դառնա փոխգործակցությանը նոր թափ հաղորդելու տեսանկյունից:
Նախարարները պայմանավորվածություն են ձեռք բերել աշխատանքներ տանել իրավապայմանագրային դաշտի ընդլայնման ուղղությամբ՝ ստորագրման պատրաստել ԱԳՆ-երի միջև համագործակցության, առևտրա-տնտեսական, մշակութային, մուտքի արտոնագրային ռեժիմի դյուրացման ոլորտներում փոխգործակցության մասին համաձայնագրեր, ընդլայնել համագործակցությունը և միմյանց թեկնածությունների աջակցությունը միջազգային կազմակերպություններում, ինչպես նաև քայլեր ձեռնարկել զբոսաշրջության զարգացման համար:
Նախարար Նալբանդյանը ներկայացրել է Հայաստանի արտաքին քաղաքականության հիմնական ուղղություններն ու առաջնահերթությունները, կովկասյան տարածաշրջանում համագործակցության և անվտանգության հաստատման ուղղությամբ ձեռնարկվող քայլերը, արցախյան հիմնախնդրի կարգավորման գործընթացի վերջին զարգացումները: Այս առումով Վիետնամի ԱԳ նախարարը աջակցություն է հայտնել միջազգային իրավունքի հիման վրա արցախյան հիմնախնդրի խաղաղ կարգավորմանը:
Ֆամ Բին Մինը իր հայաստանցի գործընկերոջը տեղեկացրել է ասիական տարածաշրջանում տեղի ունեցող գործընթացների և դրանց վերաբերյալ Վիետնամի մոտեցումների մասին:
Հայաստանի և Վիետնամի ԱԳ նախարարները նաև մտքեր են փոխանակել Մերձավոր Արևելքում ընթացող իրադարձությունների վերաբերյալ:
Հանոյ Էդվարդ Նալբանդյանի այցի օրակարգում էր նաև այցելությունը 1959թ. հիմնադրված Դիվանագիտական ակադեմիա, ուր նա Հայաստանի արտաքին քաղաքականության ու հայ-վիետնամական հարաբերությունների մասին ելույթ է ունեցել կրթօջախի ուսանողների առջև:
