Եվ այսպես, երեկ հայտնի է դարձել, որ խորհրդարանի առաջիկա ընտրություններում ՀՀԿ համամասնական ցուցակը գլխավորելու է Սերժ Սարգսյանը: Սակայն այս պահին երևի թե ավելի էական հարցն այն է, թե ինչ պրակտիկ մասնակցություն է Սերժ Սարգսյանն ունենալու նախընտրական պայքարի ընթացքում: Այսինքն, նա լինելու է ակտիվ քարոզչական դաշտո՞ւմ, թե՞ ավելի շատ ֆորմալ բնույթ է կրելու նրա՝ համամասնական ցուցակի առաջին համար լինելը: Այլ կերպ ասած` հարցը հետևյալն է՝ Սերժ Սարգսյանը նախագահի ընտրություններից առաջ վարկաբեկելո՞ւ է ՀՀԿ-ին, թե՞ ոչ:
Եթե Սերժ Սարգսյանը նախընտրական քարոզարշավում ստանձնում է ակտիվ դերակատարություն, դա նշանակում է, որ նախագահի ընտրություններից առաջ վարկաբեկում է ՀՀԿ-ին` ակնարկելով, որ առանց իրեն կուսակցությունն ունակ չէ խորհրդարանի ընտրություն հաղթել, դրանով նաև միաժամանակ ցույց տալով, որ նախագահի ընտրություններում էլ իր հույսը ՀՀԿ վրա չէ: Իսկ եթե Սերժ Սարգսյանը մի կողմ է քաշվում և ընդամենը ֆորմալ մասնակցություն ունենում ընտրարշավին, ապա այստեղ իրավիճակն այլ է, և փաստորեն Սերժ Սարգսյանը, այսպես ասած, ՀՀԿ-ի չեզոքացման պլանը հետաձգում է և թողնում նախագահի ընտրություններից հետո իրականացնելուն: Իսկ պլանի հետաձգման պատճառ կարող է լինել այն, որ որոշակիորեն այլ պլաններ դրսևորեց Բարգավաճ Հայաստանը, որին դիմագրավելու համար Սերժ Սարգսյանին անհրաժեշտ է ՀՀԿ-ն:
Բայց, մյուս կողմից, եթե Սերժ Սարգսյանն ինքն է անմիջական քարոզչական առաջամարտիկի դերը ստանձնում, դրանով իսկ միևնույն ժամանակ ցույց է տալիս, որ Բարգավաճ Հայաստանի պլաններն ու այդ թվում` Վարդան Օսկանյանի անդամակցությունը կուսակցությանը ամբողջությամբ իր վերահսկողության տակ են և ինքը կարող է իրեն թույլ տալ առանց թիկունքից կամ ներսից հարվածի ռիսկի, ստանձնել խորհրդարանի ընտրություններում իշխանական քարոզչության լոկոմոտիվի դերը: Այդպիսով, Սերժ Սարգսյանի անունը ՀՀԿ ցուցակի առաջին տեղում, մեծ հաշվով, քիչ բան է ասում ներիշխանական իրավիճակի մասին, և բուն մեսիջը կլինի արդեն մասնակցության ձևաչափի պարագայում: