Այս տարվա փետրվարի 16-ին Թուրքիայի կինոթատրոններում ցուցադրվել է «1453 թվականի նվաճում» գեղարվեստական կինոնկարի պրեմիերան։
Երկուսուկես ժամ տևողության ֆիլմում կան պատերազմի ազդեցիկ տեսարաններ, արյունահեղություն, դաժան կռիվներ, «հերոսամարտ», որի ընթացքում թուրքերը պարտության են մատնում հույներին։ Այս մասին տեղեկացնում է «Ազատություն» ռադիոկայանը։
Ֆիլմում պատմվում է Մեհմեդ Երկրորդի կողմից անառիկ ամրոցի համբավ ունեցող Կոնստանդնուպոլսի գրավման մասին, ինչը թուրքերն իրենց պատմության փառավոր էջերից են համարում։ Հույն պատմաբանները և կինոգետներն, իհարկե, արձագանքել են սրան՝ դեռ այս տարեսկզբին քննադատական հոդվածներ հրապարակելով ֆիլմի մասին։
«Ռեժիսոր Ֆարուք Աքսոյի ֆիլմում թուրքերը պատկերված են որպես աշխարհի տիրակալներ։ Խոսք իսկ չկա այն մասին, որ Կոնստանդնուպոլսի գրավումն ուղեկցվել է հույն խաղաղ բնակչության դաժան զանգվածային սպանդով և թալանով», – գրել է «Տո Պրոտո Թեմա» պարբերականը։
Մինչդեռ ժապավենը նկարահանած «Աքսոյ Ֆիլմ Փրոդաքշըն» ընկերության խոսնակը պնդում է, որ դեռ նկարահանումներից առաջ թուրք անվանի պատմաբանները ընթերցել են սցենարը և դրան հավանություն են տվել։
Ֆիլմի համար, որի նկարահանումները երեք տարի են տևել, ծախսվել է 17 միլիոն դոլար, ինչը բավական համեստ գումար է արևմտյան «բլոքբասթերների» համար ծախսված հարյուրավոր միլիոնների համեմատությամբ։
«1453 թվականի նվաճումը» ֆիլմի պրեմիերան թուրքական կինոթատրոններում առաջին օրը ցուցադրվել է ճիշտ ժամը 14-ն անց 53-ին։
Ֆիլմը Թուրքիայում արդեն դիտել է 1 միլիոն 400 հազար մարդ։
«The Wall Street Journal պարբերականը նշում է, որ անցած տասնամյակների ընթացքում Թուրքիայում ինչ-որ իմաստով փորձել են ձերբազատվել օսմանյան անցյալից, սակայն վերջին ժամանակահատվածում այդ թեմայի վերածնունդ է` հրատարակվում են գրքեր, նկարահանվում են ֆիլմեր և հեռուստասերիալներ։
Սա անխուսափելիորեն խթանում է ազգայնական տրամադրությունները մի երկրում, որը ղեկավարում են չափավոր իսլամիստները»,– նշում է «Ազատություն» ռադիոկայանը։
