ՄԱԿ-ի նախկին գլխավոր քարտուղար Քոֆի Անանը, ով այսօր նշանակվել է Սիրիայում ՄԱԿ-ի և Արաբական երկրների լիգայի հատուկ ներկայացուցիչ, կոչ է արել առավելագույն ջանք գործադրել երկրում բռնությունը դադարեցնելու և հակամարտությունը խաղաղ ճանապարհով կարգավորելու համար։ Այս մասին հաղորդում է Reuters-ը:
«Ես հույս ունեմ, որ բոլոր մասնակիցները սերտորեն կհամագործակցեն ՄԱԿ-ի և Լիգայի հետ՝ միասնական և նպատակամղված ջանքեր գործադրելով՝ բռնությունները և մարդու իրավունքների ոտնահարումը դադարեցնելու, ինչպես նաև ճգնաժամի խաղաղ լուծմանը հասնելու համար»,- ասաց նա:
Հիշեցննք, որ այսօր Նյու Յորքի՝ ՄԱԿ-ի շտաբ-գրասենյակում տեղի ունեցած արտահերթ նիստում ՄԱԿ-ի գլխավոր քարտուղար Պան Գի Մունը և Արաբական երկրների լիգայի ղեկավար Նաբիլ Ալ-Արաբին հաստատել են Քոֆի Անանին՝ Սիրիայում ճգնաժամի կարգավորման երկու կազմակերպությունների միակ հատուկ ներկայացուցչի պաշտոնում: Հանդիպման արդյունքների հիման վրա հրապարակված հայտարարության մեջ ընդգծվում է, որ ԱՆանը փորձառու դիվանագետ է և «կկարողանա ապահովել գործընթացի կազմակերպումը` ուղղված բռնության և մարդու իրավունքների ոտնահարման դեմ, ինչպես նաև Սիրիայի հակամարտության խաղաղ կարգավորման լուծում գտնել»:
