«Հանրապետություն» կուսակցության հայտարարությունը, որ ՀԱԿ-ի համամասնական ցուցակում ներկայացված կլինի միայն Արամ Սարգսյանը, «Ժողովրդավարական հայրենիք» կուսակցության նախագահ, ՀԱԿ ներկայացուցիչ Պետրոս Մակեյանը «շատ նորմալ» գնահատեց: «Առաջին լրատվական»-ի հետ զրույցում նա նշեց, որ ամեն մի կուսակցություն ինքն է որոշում ընտրություններին իր մասնակցության ձևաչափը և այդ հայտարարության տեքստը նորմալ է:
«Իրենք հայտարարում են, որ մանդատի խնդիր չեն տեսնում, միայն իրավիճակը փոխելու առաջնահերթության խնդիր են տեսնում: Սա ես գնահատում եմ նորմալ և որևէ արտառոց բան չեմ տեսնում»,- ասաց Պ. Մակեյանը՝ հավելելով, որ եթե կուսակցությունն ընտրություններին մասնակցում է ՀԱԿ-ի հետ դաշինքով, նաև վերջինիս հեղինակության որևէ խնդիր չի դրվում. «Խնդիրը ձևափաչն է: Իրենք տեսնում են, որ ընտրությունները պետք է որպես միջոց օգտագործվեն՝ իրավիճակ փոխելու համար»:
Հիշեցնենք, որ երեկ «Հանրապետություն» կուսակցության տարածած հայտարարության մեջ նշվում էր, որ «կուսակցությունը ՀՀ հինգերորդ գումարման Ազգային ժողովի ընտրությունները դիտարկում է որպես սահմանադրական կարգը վերականգնելու իրավական հնարավորություն», սակայն «պատգամավորական մանդատների ձեռքբերումից առավել կարևորում են համակարգային իրական փոփոխությունների իրականացումը»:
