Հունվարի 9-ին Սյունիքի մարզի երկու գյուղական համայնքներում կայացան 2011թ-ի ՏԻՄ առաջին ընտրությունները: Ձորաստանի համայնքում ընտրողները ընտրեցին համայնքի ղեկավար, իսկ Անտառաշատ գյուղում համայնքի ավագանու անդամների ընտրություններ էին: Ձորաստանի 64 ընտրողներից քվեարկությանը մասնակցած 41 ընտրողից 39-ը քվեարկել են գործող գյուղապետ, անկուսակցական Ավետիս Ավետիսյանի օգտին: Վերջինս, ի դեպ, առաջադրված միակ թեկնածուն էր: Երկու քվեաթերթիկ անվավեր է ճանաչվել: Անտառաշատի 104 ընտրողից քվեարկությանը մասնակցել է 53 մարդ: Առաջադրված 5 թեկնածուներն էլ համապատասխան քվեներ են ստացել ու բնականաբար ընտրվել են: Ավագանու անդամների թեկնածուներից 4 անկուսակցական են, մեկը «Բարգավաճ Հայաստան»-ի անդամ: Ի դեպ, թեկնածուներից մեկը կին է: Անկուսակցական Լիլիթ Հարությունյանը Անտառաշատի գյուղապետ, ԲՀԿ անդամ Արսեն Դավթյանի կինն է, ու գեղեցիկ սեռի ներկայացուցիչը ստացել է ամենաշատ` 19 քվե: Ավելացնենք, որ. փետրվարի 20-ին Մեղրիի տարածաշրջանի Կուրիս և Գորիսի տարածաշրջանի Քարաշեն գյուղական համայնքներում նույնպես նշանակվել են տեղական ինքնակառավարման մարմինների հերթական ընտրություններ: Կուրիսում կանցկացվեն համայնքի ղեկավարի, իսկ Քարաշենում` համայնքի ավագանու ընտրություններ: