Հայաստանի ճարտարապետների միության նախագահ Մկրտիչ Մինասյանը զորակցություն է հայտնել Մաշտոցի այգում տեղադրվող կրպակների դեմ արդեն 14-րդ օրը պայքարող ակտիվիստներին:
«Ազատություն» ռադիոկայանի հետ զրույցում Մինասյանը ասել է.
«Երիտասարդների հետ ենք, իհարկե: Վերջապես կարողացան մարդիկ իրենց ցանկությունները ասել, բայց սա, ինձ թվում է, հետևանք է այն բոլորին, որը 10 տարի անընդհատ կատարվում է` սկսած Հաղթանակ զբոսայգում հյուրանոցի տեղադրելուց», –
Ճարտարապետների միության նախագահը արժանահավատ չի համարում քաղաքային իշխանությունների վստահեցումները, թե տեղադրված կրպակները այգու 10 տոկոսը չեն գերազանցում, ինչպես պահանջում է Երևանի գոտիավորման կարգը:
«10 տոկոս ասելով` մենք ընդհանրապես օկուպացիայի ենթարկեցինք օղակաձև զբոսայգին, 10 տոկոս ասելով, մենք օկուպացրեցինք Օպերայի բակը», – ասել է նա:
Ըստ Մկրտիչ Մինասյանի ստեղծված դրությունը շատ բարդ է:
Նա գտնում է, որ հարցը պետք է լուծվի առաջին հերթին հօգուտ քաղաքացիների: Միևնույն ժամանակ, նա կարծում է, որ կրպակների ժամանակավոր տեղադրումը «տանելի» լուծում է:
«Ընդհանրապես, այդ այգում կրպակները տեղ չունեն: Բայց եթե խնդիրը այնպիսին է, որ ինչ-որ ժամկետային լուծման խնդիր է լինում, կարելի է նաև գնալ դրան: Ինձ թվում է, որ երիտասարդները կկարողանան նաև իրենք ողջամիտ լինել, որպեսզի սուր բախումներ չլինեն», – ասել է Ճարտարապետների միության նախագահը: – «Վերջին հաշվով, սա բոլորիս գործն է: Լավ է, որ դրված է ընդհանուր քննարկման և մենք մի ընդհանուր լուծման պետք է գանք: Մենք նաև պետք է օժանդակենք նոր քաղաքապետին, որպեսզի նա այս ամեն ինչից ոչ թե հուսալքվի, այլ ընդհակառակը` զգա, որ քաղաքացիները իր մեջքի հետևը կանգնած են»:
