Հայաստանում նարկոբիզնեսը գործում է խիստ գաղտնի, խիտ գործած ցանցի պես, որտեղ մուտք գործելը գրեթե անհնար է, եթե այդ «մեծ ընտանիքի» անդամ չես։ Մեր երկրում թմրանյութերի բիզնեսով զբաղվողները ճանաչում են միմյանց ու գործում միասին՝ սատարելով ու պաշտպանելով ընդհանուր շահերը։ Իրար ճանաչում են նաև թմրանյութեր օգտագործողները և հարկ եղած դեպքում «իրար ձեռք են բռնում»: Հայաստանում սպառվում են տարբեր թմրադեղեր՝ հիմնականում հայրենական արտադրության։ Տեղական թմրադեղերը պատրաստվում են մեծ մասամբ Արտաշատում ու Արմավիրում՝ հիմնականում մարիխուանա, քանի որ դա է հայ սպառողի նախընտրած թմրանյութը։ Թմրադեղերի հայկական շուկայում կարելի է գտնել նաև կոկային, հերոին, որոնք, սակայն, հասու չեն սովորական մարդկանց: Բացի այդ, մեր զրուցակիցը, ով հասկանալի պատճառներով չցանկացավ ներկայանալ, պնդում է, որ Հայաստանում գրեթե անհնար է «մաքուր» կոկային և հերոին գտնել, քանի որ վերջիններս միայն հատուկ «պատվերով» և կոնկրետ մարդկանց համար են բերվում Հայաստան: Ամեն դեպքում, «մեծ շուկայում» վաճառվող «կոկս»-ի մեկ-երկու «բաժինը» արժե մոտ 80,000 դրամ։ Ներկրվող թմրանյութերից են նաև հոլանդական ու ամերիկյան մարիխուանաները, չնայած արդեն մեր երկրում էլ է արտադրվում մարիխուանա` հոլանդական տեխնոլոգիայով։ Հայաստան մարիխանա է մտնում նաև Աֆղանստանից և Իրանից. հարավային հարևանից հիմնականում ստանում ենք «պլաստիլին» կոչվող թմրանյութը, որը նույնպես մարիխուանայի հիմք ունի:
«Հայկական շուկայում» մարիխուանայի գինը տատանվում է 5,000-25,000 դրամի միջև` կախված որակից, «ծննդավայրից» և միջնորդից: Տեղական մարիխուանայի մի «կոշտը» միջինը արժե մոտ 12,000 դրամ, հոլանդական մարիխուանայինը՝ մոտ 20,000 դրամ։
