Քաղաքապետարանը պետք է փոխի Մաշտոցի պուրակում էլիտար կրպակների տեղադրման որոշումը, և վերջ: «Առաջին լրատվական»-ի հետ զրույցում նման տեսակետ հայտնեց «Թռչկան» քաղաքացիական նախաձեռնության անդամ, իրավաբան Արթուր Գրիգորյանը`խոսելով այն իրավական քայլերի շուրջ, որոնց միջոցով կարող է փոխվել Մաշտոցի պուրակում էլիտար կրպակների տեղադրման որոշումը: Նա նշեց, որ միակ լուծումն այն է, որ քաղաքապետարանը որոշում կայացնի պուրակից ապամոնտաժել էլիտար կրպակները՝ առանց որևէ վերապահման:
«Քաղաքապետարանը փոխում է իր որոշումը, և այդ տարածքում կառուցապատման իրավունք ունեցող Կանաչապատում ՓԲԸ-ն զրկվում է իրավասություններից: Այլ իրավական ուղի չկա: Եթե ընտրենք դատական ճանապարհը, կլինի Ուսանողական այգու օրինակը: Այգու օրինակով մենք պարզեցինք, որ դատարանը պարզապես չընդունեց հայցը, քանի որ, իբրև թե, պատշաճ հայցվոր չենք: Մաշտոցի պուրակի պարագայում դատարան դիմելու դեպքում կարող է նույնը կրկնվել»,- նշեց Ա. Գրիգորյանը`հավելելով, որ զանազան ակցիաներով, պատկան մարմիններին դիմումներ գրելով, հնարավոր բոլոր միջոցներով պետք է ճնշում գործադրվի քաղաքապետարանի վրա:
Հիշեցնենք, որ արդեն 13-րդ օրն է, ինչ «Մեր քաղաքը», «Մենք ենք այս քաղաքի տերը», «Թռչկան» բնապահպանական քաղաքացիական նախաձեռնությունների ակտիվիստները, Մաշտոցի պուրակի ճակատագրով անհանգստացած անձինք նստացույց են կազմակերպել այգում`պահանջելով վերացնել էլիտար կրպակների տեղադրման որոշումը: Նրանց պնդմամբ`այգին հանրային է, և պետք չէ այն օգտագործել մասնավոր շահի համար: