Նյու Յորքի դատարանը մարտի 15-ին կքննի ԱԺՄՀ նախկին նախագահ Դոմինիկ Ստրոս-Կանի դեմ ներկայացված հայցը: Ստրոս-Կանի դեմ հայց էր ներկայացրել նյույորքյան հյուրանոցներից մեկի սպասուհին, ով նրան մեղադրում էր բռնաբարության մեջ:
Ինչպես տեղեկացնում է ИТАР-ТАСС գործակալությունը, Ստրոս-Կանի նկատմամբ քրեական գործը կասեցվել էր անցյալ տարվա օգոստոսին` կասկածի տակ դնելով սպասուհու` Նաֆիսատո Դիալլոյի ցուցմունքները:
Սակայն կինը քաղաքացիական հայց էր ներկայացրել` պահանջելով նյութական փոխհատուցում՝ ֆիզիկական և բարոյական վնասի դիմաց: Սեպտեմբեր ամսին Ստրոս-Կանը, վերադառնալով Ֆրանսիա, Նյու-Յորքի դատարանից պահանջել էր հայցը չեղյալ համարել, քանի որ միջազգային օրենքի համաձայն՝ հայցն անօրինական էր ներկայացվել՝ հաշվի առնելով այն հանգամանքը, որ այն ժամանակ ինքը դիվանագիտական անձեռնմխելիություն ուներ:
Ինչպես հայտնել է սպասուհու իրավաբանը, Դիալլոն անհամբերությամբ սպասում է դատական գործընթացի սկսելուն:
