«Հյուսիսի վահան» գումարտակը՝ կազմված 500 դասալիքից, ովքեր մտադիր են պաշտպանել խաղաղ բնակչությանը Բաշար Ասադի վարչակարգից, ձևավորվել է Իդլիբում։ Այս մասին չորեքշաբթի օրը հայտնել են արաբական ԶԼՄ-ները:
Փոխգնդապետ Աֆիֆ Սուլեյմանը «Սիրիական ազատ բանակի» անունից դասալիքների առանձին գումարտակի ստեղծման մասին հանրահավաքի ժամանակ հայտարարել է, որ իր խնդիրը «խաղաղ բնակիչների և խաղաղ ցուցարարաների պաշպանությունն է Ասադի վարչակարգի հրոսակախմբերից»:
«Աֆիֆ Սուլեյմանը խոստացել է իշխող սիրիական վարչակարգին հասցնել «երկաթյա հարվածներ» և հետապնդել նրա կողմնակիցներին «ամենուր, որտեղ էլ, որ գտնվեն»»,– հաղորդում է РИА Новости-ն:
«Սիրիական ազատ բանակը», որը ձևավորված է փախստականներից ու դասալիքներից, համարվում է ընդդիմության զինված թևը: Այն կազմավորվել է անցած տարվա աշնանը և այժմ գտնվում է ռազմաօդային ուժերի գնդապետ Ռիյադ Ասադի հրամանատարության ներքո:
Արաբական ԶԼՄ-ների տեղեկությամբ «Սիրիական ազատ բանակի» կազմում, բացի դասալիքներից, ակտիվ մասնակցություն ունեն նաև արաբական այլ երկրներից, այդ թվում՝ նաև Լիբիայից կամավոր սունիտները:
Արդեն համարյա մեկ տարի է, ինչ Սիրիայում չեն դադարում հակակառավարական ելույթները, ամեն օր լուրեր են ստացվում մարդկային կորուստների մասին: Զոհվում են ինչպես խաղաղ բնակիչները, այնպես էլ ուժային կառույցների աշխատակիցները: Ընդդիմությունը պահանջում է ներկա նախագահ Բաշար Ասադի հրաժարականը և ժողովրդավարական խորհրդարանական ընտրությունների անհապաղ անցկացում: ՄԱԿ-ի տվյալներով՝ երկրում անկարգությունների զոհ է դարձել ավելի քան 5000 մարդ:
