Այսօր սկսվում է Ամերիկայի կինոակադեմիայի կինոարվեստի 5783 անդամների հարցաթերթիկների հաշվարկը, որոնք նախապես՝ փետրվարի 2-ին, նրանց էին ուղարկվել փոստով: Հենց նրանց ձայներն են որոշիչ դառնում «Օսկարի» մրցանակաբաշխության արարողությանը:
Քվեարկելու իրավունք ունեցող կինոակադեմիկոսների ցանկում են դերասաններ Հարիսոն Ֆորդը, Քոլին Ֆերտը, Ջուլիանա Մուրը, Մոնիկը, ռեժիսորներ Քվենտին Տարանտինոն, Սոֆյա Կոպոլան, Ռոջեր Կորմանը, երաժիշտներ Բրայան Ադամսը, Էրիկ Քլեպտոնը, Էջը՝ U2 խմբից: Այս մասին հաղորդում է ITAR-TASS գործակալությունը:
1934 թվականից ի վեր ձայների հաշվարկը կատարում է միջազգային աուդիտորական PricewaterhouseCoopers (PWC) ընկերությունը, որը պարտավոր է ստուգել, որ ակադեմիկոսներից ոչ ոք չստանա դատարկ ծրարներ կամ երկու հարցաթերթիկ:
Լրացված ծրարները պետք է PWC-ի տրամադրության տակ լինեն ոչ ուշ, քան տեղական ժամանակով ժամը 17:00-ն: Այն ծրարները, որոնք կուշանան թեկուզ մեկ րոպեով, կհամարվեն անվավեր:
5 օրվա ընթացքում աուդիտորները պետք է հաշվեն ձայներն ու որոշեն հաղթողներին, որոնց անուններով ծրարները կդրվեն հատուկ կնքված ծրարների մեջ, որոնք պետք է բացվեն Լոս Անջելեսի «Կոդակ» թատրոնում փետրվարի 26-ի երեկոյան Ամերիկայի կինոակադեմիայի 84-րդ մրցանակաբաշխության` մրցանակների շնորհման ընթացքում: