Թուրքական Hürriyet թերթի փոխանցմամբ՝ թուրքական դպրոցներից մեկի տնօրեն Մուսթաֆա Այդինն Էրզրումում կազմակերպված «Բռնությունները երեխաների շրջանում և դրա կանխման ուղիները» թեմայով հանդիպման ժամանակ առաջարկել է անցկացնել նորածին երեխաների արյան հետազոտություն՝ նրանց գենետիկ նախահակումը պարզելու և երկրի համար «պոտենցիալ վտանգ» ներկայացնողներին «վերացնելու» համար.
«Ծնվելուց անմիջապես հետո պետք է ստուգել այդ երեխաներին: Եթե հնարավորություն կա, որ ապագայում նրանք վնաս կհասցնեն երկրին ու ազգին, ապա այդ երեխաներին պետք է վերացնել նախքան նրանք կսկսեն քայլել:
Առաջարկում եմ ոստիկանական բաժանմունքներից ստանալ հանցագործների արյան հետազոտությունները և օգտագործել նրանց գենետիկ կոդերը՝ որպես չափանիշ նորածինների արյունը ստուգելու համար:
Լավ երեխաներ մեծանում են միայն լավ ընտանիքներում: Մինչդեռ իմ բնակության վայրում երեխաների մեծամասնությունը թափառում է փողոցներում ու գող է: Մեզ համար կարող են օրինակ ծառայել Բրազիլիան ու Արգենտինան, ուր գործում են երեխաների լիկվիդացման հատուկ կազմակերպություններ»:
Թերթը գրում է, որ այս ելույթից հետո Թուրքիայի կրթության նախարարությունը նրան հեռացրել է զբաղեցրած պաշտոնից: Բացի այդ, տարվում է հետաքննություն:
