Բացի քաղաքական դրդապատճառներից, «Հազարամյակի մարտահրավեր» ծրագիրը (ՀՄ) տնտեսական առումով Հայաստանում շատ ավելի անարդյունավետ իրականացվեց, քան թե Վրաստանում: Այս մասին «Առաջին լրատվական»-ի հետ զրույցում նշեց տնտեսագետ Վահագն Խաչատրյանը: Ըստ նրա՝ դա էլ էր պատճառներից մեկը, թեև ոչ գլխավորը, որ ՀՄ կորպորացիայի տնօրենների խորհուրդը որոշեց շարունակել Վրաստանին գումար հատկացնելը: «Բացի նրանից, որ ծրագիրը սկսելու հենց սկզբից պարզվեց, որ Հայաստանը ժողովրդավարության հետ կապված լուրջ խմդիրներ ունի, որոշ ժամանակ հետո` գործընթացի ընթացքում, պարզվեց նաև, որ գումարների ծախսման արդյունավետության հետ խնդիր կա: Այս պատճառով էր, որ հասարակական խորհդի անդամներից ոմանք դուրս եկան խորհրդից, երբ պարզվեց, որ գումարների ծախսման առումով խնդիրներ էին եղել»,- նշեց Վ. Խաչատրյանը: Ըստ նրա՝ Հայաստանը ՀՄ-ի գումարների կարիքը շատ ունի: «Հայաստանի իշխանությունները տարբեր տեղերում, հատկապես` Ռուսաստանում անընդհատ գումարներ են փնտրում: Այսպես թե այնպես, ՀՄ-ի փողերը ներդրումներ են, որոնք տրվում են ոչ թե վերդարձելիության սկզբունքով և տոկոսով, այլ որպես օգնություն: Դա, իհարկե, էականորեն կբարելավեր Հայաստանի ենթակառուցվածքների վիճակը` ողջ տնտեսության համար զարգացման ավելի բարենպաստ հիմք ստեղծելով»,- ասաց Վ.Խաչատրյանը` հավելելով, թե հենց այս հանգամանքը հասկանալով էր, որ Վրաստանի իշխանությունները ամեն ինչ արեցին ծրագիրը շարունակելու, ներդրումները մեծացնելու համար: