Ճապոնիայի իշխանությունները անվտանգության հավելյալ միջոցառումներ պետք է ձեռնարկեն Տոկիոյի անվտանգությունն ապահովելու ուղղությամբ:
Ճապոնացի գիտնականների հետազոտություններից պարզվել է՝ հավանականություն կա, որ երկրի մայրաքաղաքի շրջանում մոտ ապագայում տեղի ունենա ուժեղ երկրաշարժ: Այս մասին հայտարարել է Ճապոնիայի մշակույթի, լուսավորության, սպորտի, գիտության ու տեխնոլոգիայի նախարար Հիրոֆումի Հիրանոն:
Նրա խոսքով` սեյսմաակտիվության վերջին տվյալների ուսումնասիրությունից պարզվել է, որ Տոկիոյի ծովածոցի հյուսիսում կարող է տեղի ունենալ ավելի ուժեղ երկրաշարժ, քան ավելի վաղ կանխատեսում էին գիտնականները:
«Մենք պարտավոր ենք ուժեղացնել անվտանգության կանոնները տարերային աղետի դեպքում»,- հայտարարել է նախարարը` հավելելով, թե այդ մասին պաշտոնական տեղեկատվությամբ հանդես կգա արդեն մարտի սկզբին: Սեյսմոլոգների խումբը պետական աջակցությամբ վերջերս անցկացրել էր հետազոտություն Տոկիոյում` այնտեղ տեղադրելով 300 նորագույն տվիչներ.
7.3 մագնիտուդով երկրաշարժի դեպքում կառաջանա ուժեղ ցնցում Տոկիոյի ծովածոցում:
Այդ կապակցությամբ երկրի կառավարությունը ապրիլից կձեռնարկի անվտանգության հավելյալ միջոցառումներ:
Հոռետեսական կանխատեսումների համաձայն` 7.3 մագնիտուդով երկրաշարժի հետևանքով, վատագույն սցենարի դեպքում, կարող է զոհվել 11 հազար մարդ ու հողին հավասարեցվի 850 հազար շինություն։
