«Նովոստի» միջազգային մամուլի կենտրոնում այսօր կազմակերպվել էր ՀԱՊԿ գլխավոր քարտուղար Նիկոլայ Բորդյուժայի տեսակամուրջ ձևաչափով մամուլի ասուլիսը՝ Երևանի, Աստանայի, Կիևի և Քիշնևի մասնակցությամբ:
2012-ին նշվում է Հավաքական անվտանգության պայմանագրի ստորագրման 20 և ՀԱՊԿ ստեղծման 10-ամյակը: Ինչպիսի՞ն պետք է լինի կազմակերպությունը ժամանակակից նոր մարտահրավերների և տարածաշրջանային ու միջազգային անվտանգության սպառնալիքների պայմաններում, ի՞նչ դիրքորոշում կունենա ՀԱՊԿ-ն Իրանի դեմ Արևմուտքի ռազմական գործողության դեպքում, որը կարող է անմիջականորեն ծավալվել անդամ պետություններից մեկի սահմանին: Արդյոք ՀԱՊԿ-ն կարո՞ղ է անվտանգության երաշխիքներ տրամադրել այն պետություններին, որոնք ընդգրկված են չեն կազմակերպության կազմում, եթե նրանք օգնություն խնդրեն… Ահա այս հարցերն էին քննարկում տեսակամուրջի մասնակիցները:
ՀԱՊԿ գլխավոր քարտուղար Նիկոլայ Բորդյուժան նկատեց, որ կազմակերպությունը անցնող տարում համագործակցել է միջազգային կազմակերպությունների հետ, և նկատեց, որ մեծ ծրագրեր ունեն ապագայի հետ կապված՝ նշաձողը պահելու են, և ակտիվությունը կշարունակվի նաև այս տարի:
Կազմակերպության ընդլայնմանը վերաբերող հարցին պատասխանեց. «Հարցը ինձ չպետք է ուղղել, դա պետություններն են որոշում: Սակայն մենք տարբեր ոլորտներում աշխատում ենք բազմաթիվ երկրների, միջազգային կառույցների հետ: Իսկ գործընկերների կազմը ընդլայնելու ուղղությամբ, իհարկե, մտածում ենք»,- նկատեց Բորդյուժան:
ԼՂ հակամարտության կարգավորման վերաբերյալ նա հետևյալ կարծիքի է. «Հակամարտության կարգավորման գործընթացում մենք չենք խառնվում: Հայաստանը մեր գործընկերն է, բայց ԵԱՀԿ ՄԽ-ի շրջանակներում բանակցությունները շարունակվում են. սա արդեն գործող համակարգ է, նոր բան հնարել պետք չէ, իսկ հակամարտությունը բավականին բարդ է» :
Ըստ Ն.Բորդյուժայի՝ բացասաբար են վերաբերվում Բելառուսի նկատմամբ պատժամիջոցներին։ Նրա կարծիքով՝ խնդիրները պետք է լուծել այլ մակարդակով:
Հարցին` ինչպե՞ս կարձագանքի ՀԱՊԿ-ն ԼՂ հակամարտության կարգավորման ճգնաժամային իրավիճակում, պատասխանեց. «ՀՀ-ն ՀԱՊԿ լիիրավ անդամ է՝ իր պարտավորություններով, և իրավունք ունի օգնություն ստանալ դաշնակիցներից: Ինչպե՞ս: Ամեն ինչ կախված է գործողությունների ձևաչափից, դրանից ելնելով էլ՝ որոշում կկայացվեն, բայց դա ոչ միայն ռազմական գործոնին է վերաբերում, այլև քաղաքական ու այլ ոլորտների: Այսօր ես չեմ կարող ասել`ինչպես կարձագանքենք: Բայց կարող եմ ասել, որ Հայաստանը ՀԱՊԿ-ի կողմից կստանա անհրաժեշտ աջակցությունը, որի իրավունքը նա ունի»,- նկատեց Բորդյուժան` զերծ մնալով առավել մանրամասնելուց:
Հարցին՝ ինչպե՞ս կվարվի ՀԱԿՊ-ը Իրանի նկատմամբ հնարավոր ռազմական գործողությունների դեպքում, Բորդյուժան պատասխանեց. «Լավ կլինի, որ ռազմական հարվածներ չլինեն Իրանի նկատմամբ, քանի որ սա մեծ տարածաշրջան է, բայց եթե դա տեղի ունենա` հետևանքները խիստ բացասական կլինեն: Մենք, իհարկե, դիտարկում ենք իրավիճակը՝ եթե փախստականներ լինեն, ինչ քայլեր ենք ձեռնարկելու: Բայց հուսանք, այնուամենայնիվ, որ Իրանի նկատմամբ գործողություններ չեն լինի»:
