Ադրբեջանական APA լրատվական գործակալության փոխանցմամբ՝ Հունաստանի ու Իտալիայի կառավարությունները չեն հրաժարվում ITGI (Թուրքիա, Հունաստան, Իտալիա) գազատարի նախագծից:
Երկու երկրների էներգետիկայի նախարարությունները հայտարարել են, որ շարունակելու են նախկինի նման առաջ տանել այդ նախագիծը՝ որպես ադրբեջանական գազը դեպի Եվրոպա փոխադրելու միջոց՝ չնայած նրան, որ «Շահ Դենիզ» կոնսորցիումը որոշել է հրաժարվել այդ նախագծից:
Նրանք հավելել են, որ, իրենց կարծիքով, ITGI-ն թեկնածու երթուղիների թվում ամենազարգացած ու հասուն նախագիծն է: Նախագծին մասնակցում են իտալական Edison և հունական DEPA ընկերությունները:
Հիշեցնենք, որ ITGI-ի նախագծով ենթադրվում էր, որ գազատարն ունենալու է մոտ 800 կիլոմետր երկարություն և Թուրքիա-Հունաստան-Իտալիա երթուղով ադրբեջանական և կասպյան գազը պետք է հասցներ Եվրոպայի հարավ: Գազատարի թողունակությունը պետք է կազմեր 8-10 միլիարդ խորանարդ մետր:
