Լոնդոնում փակվում է լեգենդար «Թվիքենհեմ» (Twickenham Film) կինոստուդիան, որը մոտ 100 տարվա պատմություն ունի։
Ինչպես հաղորդում է BBC-ն, ստուդիան իր աշխատանքները կդադարեցնի արդեն առաջիկա ամիսներին: Որոշ տվյալներով՝ այն կփակվի ընթացիկ տարվա հունիսին: Այս պահին ստուդիայի աշխատակիցների կեսը հեռացվել են աշխատանքից, մյուսներին տեղյակ են պահել սպասվող կրճատումների մասին: Ստուդիայի տնօրեն Ջերալդ Կրասները հայտնել է, որ ստուդիայի փակվելու պատճառը ֆինանսական կորուստներն են:
«Թվիքենհեմ» ստուդիան, որը սկզբնապես կոչվել է«Սենթ Մարգարետ», բացվել է 1913 թ. նախկին սահադաշտի տեղում: 1929 թ. այն վերանվանվել է «Թվիքենհեմ»:
Ստուդիայի կողմից նկարահանված հայտնի ֆիլմերից են Շերլոկ Հոլմսի մասին «Ռեմբրանդտի կորած կտավը» (1932 թ.) , ինչպես նաև The Beatles խմբի մասնակցությամբ A Hard Day’s Night (1964 թ.) և Help! (1965 թ.) ֆիլմերը:
Այստեղ է նկարահանվել նաև վերջերս էկրան բարձրացած «Երկաթե լեդի» ֆիլմը, որում Մեծ Բրիտանիայի նախկին վարչապետ Մարգարետ Թետչերին մարմնավորում է Մերիլ Սթրիփը:
«Շատ ցավում եմ, որ ստուդիան փակվում է,- BBC-ին հայտնել է ստուդիայի բեմադրիչ Ռուպերտ Լլոյդ Փերին:- Սա մեծ Բրիտանիայի ամենահին ստուդիաներից մեկն է… Փակվելը արդարացված չի թվում, չէ՞ որ կինոստուդիան այժմ ծաղկում է ապրում»:
