«Լրատվամիջոցներն օրերս գրել էին ՀՀ Ոստիկանության Պետական պահպանության գլխավոր վարչության պետի տեղակալ գնդապետ Հայկ Ստեփանյանի մասին, ով Սադախլոյի անցակետում փախուստի փորձ կատարելիս փետրվարի 19-ին, ձերբակալվել է»,- գրում է «168 ժամ»-ը և հավելում.
«Նշենք, որ Հ. Ստեփանյանը ՀՀ ոստիկանապետ Վլադիմիր Գասպարյանի ամենամտերիմ մարդկանցից մեկն է, տարիներ շարունակ աշխատել է Ռազմական ոստիկանությունում՝ Վ. Գասպարյանի տեղակալի պաշտոնում: Ապա, Վ. Գասպարյանի՝ ՀՀ Պաշտպանության փոխնախարար նշանակվելուց հետո Հ. Ստեփանյանը եղել է նրա օգնականը, այնուհետև, Գասպարյանի` ՀՀ Ոստիկանապետ նշանակվելուց հետո, նա նշանակվել է Ոստիկանության Պետական պահպանության գլխավոր վարչության պետի տեղակալի պաշտոնում: Նշվում էր. որ Ստեփանյանի Ռազմական ոստիկանությունում ծավալած բազմամյա ապօրինությունների մասին նախագահականում ամիսներ շարունակ նյութեր են կուտակվել, որոնք էլ հիմք են հանդիսացել, որպեսզի նա ԱՄՆ-ից վերադառնալուն պես պաշտոնանկ արվի և ձերբակալվի:
Այս տեղեկատվության հրապարակումից հետո բազմաթիվ իրարամերժ հայտարարություններ եղան Ոստիկանության երկու աշխատակիցների կողմից. Հայկ Ստեփանյանը հերքել է. թե ընդհանրապես իրեն ձերբակալել են, և այն, որ ինքը փորձել է հատել սահմանը, իսկ Ոստիկանության Հասարակայնության հետ կապի և լրատվության վարչության պետ Աշոտ Ահարոնյանը հաստատել է, որ Հայկ Ստեփանյանը փետրվարի 19-ին իսկապես փորձել է հատել հայ-վրացական սահմանը Սադախլո անցակետով, սակայն իրավապահները նրան թույլ չեն տվել, քանի որ նա Ոստիկանությունում գոյություն ունեցող կարգի համաձայն՝ գրավոր չի իրազեկել»:
Թերթի տեղեկություններով, սակայն, Հ. Ստեփանյանը վաղուց արդեն իր նախկին գործունեության համար համապատասխան մարմինների կողմից հսկողության տակ է եղել:
«Ասում են, որ նա մի քանի տասնյակ զինծառայողների «լավություն» է արել՝ նրանց ծառայությունից ազատելու դիմաց: Ըստ մեր աղբյուրների՝ նա դրա դիմաց խոշոր գումար է վերցրել այդ զինծառայողների հարազատներից: Զինվորական ոստիկանության պետի՝ վերջին փոփոխություններից հետո ՀՀ Պաշտպանության նախարար Սեյրան Օհանյանի հրամանով համակարգում ստուգումներ են վերսկսվել այդ կապակցությամբ:
Երբ պարզվել է, որ տասնյակ զինվորներ ծառայությունը տանն են անցկացնում՝ հրահանգ է տրվել նրանց ծառայության կանչել, բերման ենթարկել: Ասում են, որ դրանից հետո այդ զինծառայողների հարազատները բողոքել են՝ պահանջելով հետ վերադարձնել իրենց տված գումարները»:
