Քաղաքական դաշտն ընտրությունների գնում է պառակտված: Այսօր կայացած քննարկման ժամանակ այս մասին ասաց Քաղաքագետների միության նախագահ Հմայակ Հովհաննիսյանը:
Քննարկմանը ներկա՝ Քաղաքագետների միության վարչության անդամ Հենրիկ Գրիգորյանն իր հերթին նկատեց, որ իշխանությունն ու ընդդիմությունը շահագրգռված են խելացի քաղաքականության մեջ:
«Շատ անգամ, սակայն, նրանց հարաբերությունները «բազարային» բնույթ են կրում: Միաժամանակ, վստահության դեֆիցիտ կա Հայաստանում երկու ինստիտուտների հանդեպ էլ, ինչն էլ երկիրը ետ է շպրտում իր բնականոն առաջընթացից»,- ասաց նա:
Հայ ազգային կոնգրեսի համակարգող Լևոն Զուրաբյանն էլ նշեց, որ իշխանություններն անում են ամեն բան, որպեսզի ընտրություններից առաջ ընդդիմությունը հավասար պայմաններում չգործի և դատապարտված լինի պարտության:
«Ես եղել եմ Հրազդանում և փաստում եմ, որ Սասուն Միքայելյանի քայլը բարդացրեց իշխանությունների վիճակը: Իշխանությունը, ինչպես նաև ՀԱԿ-ը շատ հստակ վերահսկում էին ընտրությունների ընթացքը: Բայց շնորհիվ իրավիճակը վերահսկելու` մենք 47 տոկոսի հաղթանակ արձանագրեցինք: Սա մեծագույն հաղթանակ է և նշանակում է, որ ՀԱԿ-ը մեծ ընտրազանգված ունի: Միաժամանակ, մեզ համար պարզ է, որ Հրազդանի քաղաքապետի ընտրություններում հաղթել է Սասուն Միքայելյանը: Հայտնի է, որ մոտ 4000 մարդու ահաբեկելով, կաշառելով, նրանց անձնագրային տվյալները խեղաթյուրելով` ներառել են ցուցակների մեջ: Հենց նրանց շնորհիվ էլ հաղթանակ տարավ Հրազդանի ՀՀԿ-ական քաղաքապետ Արամ Դանիելյանը:
ՀԱԿ-ը, սակայն, այս ամենից չի հուսահատվում և համարում է, որ ընտրություններն ամենահստակ մոբիլիզացիոն միջոցն են ժողովրդին միատեղելու և քաղաքական իրավիճակն առողջացնելու համար»,- ասաց Լևոն Զուրաբյանը:
ՀԱԿ համակարգողի խոսքով՝ ընտրակեղծիքներին դիմակայել անկարող են անգամ ԺՀՄԻԳ-ի դիտորդները, որոնց ներկայությամբ ընտրակեղծարարները գործում են օրինականության շրջանակներում, իսկ նրանց` ընտրատեղամասից հեռանալուց հետո շարունակում են իրենց կեղծարարությունը: «Միջազգային հանրությունը հասկանում է, որ Հայաստանը ընտրությունների առումով Եվրոպայի հիվանդ մասն է և ուշադրության կենտրոնում է պահում այն»,- ասաց Զուրաբյանը:
