Վրացական «Ասավալ-դասավալի» թերթին տված հարցազրույցի ժամանակ Վրաստանի ներքին գործերի ու պաշտպանության նախկին նախարար Իրակլի Օքրուաշվիլին, որը ներկայումս բնակվում է Փարիզում, հայտարարել է, որ վերցնում է 8 ամսով քաղաքական ընդմիջում՝ մինչև Վրաստանում կայանալիք խորհրդարանական ընտրությունները.
«Ես ոչինչ չեմ պլանավորում մինչև ընտրությունները, որպեսզի ուղղակիորեն կամ անուղղակիորեն չխանգարեմ ընդդիմադիր միլիարդատեր Բիձինա Իվանիշվիլիին: Ես չեմ պատրաստվում դատական հայց ներկայացնել նրա դեմ, ինչպես որ գրել են վրացական ԶԼՄ-ները: Իմ թշնամին նախագահ Միխեիլ Սաակաշվիլին է և նրա իշխանությունը»:
Հիշեցնենք, որ օրեր առաջ վրացական «Ռեզոնանսի» թերթը գրել էր, թե Օքրուաշվիլին պատրաստվում է դատական հայց ներկայացնել ընդդիմադիր առաջնորդ Բիձինա Իվանիշվիլիի դեմ: Հայցի պատճառը «արժանապատվությունն ու պատիվը նսեմացնող և չհաստատված լուրերի տարածումն է»:
Անգամ նշվում էր, որ Իվանիշվիլին ներկայիս դրությամբ հանդիսանում է Ֆրանսիայի քաղաքացի, և Օքրուաշվիլին դատական հայցը կներկայացնի ոչ թե վրացական, այլ ֆրանսիական դատարան:
Ավելի վաղ Իվանիշվիլին հայտարարել էր, որ Օքրուաշվիլին այսօր էլ համագործակցում է վրացական իշխանությունների հետ՝ հանդիսանալով նրանց թիմի անդամ: