Facebook սոցիալական ցանցում Մաշտոցի այգու համար պայքարողների և Երևանի քաղաքապետարանի աշխատակիցների միջև անձնական վիրավորանքները շարունակվում են:
Հիշեցնենք, որ օրերս Երևանի քաղաքապետարանի աշխատակիցները բնապահպաններին անվանել էին «վատ մամայի փիս զավակ», «պոչիկով տղա», «հորթ» և այլն: Մասնավորապես, Երևանի քաղաքապետարանի տեղեկատվության և հասարակայնության հետ կապերի վարչության աշխատակից Արթուր Սարուխանյանը պուրակում ծավալված վերջին իրադարձությունների մասին Տարոն Մարգարյանի ֆեյսբուքյան էջում գրել էր. «Լսի, վատ մամայի փիս զավակ…փախի լափ տվողիդ փեշի տակ, քանի շուտ ա, էդ ո՞ր պուրակ եք հրավիրում, ձե՞ր, գոմ-այգի՞…բռնի ուժը որոշ երկոտանիներին քիչ ա… .կլնի՞ փախնեք ձեր տերերի մոտ ու թողեք շնչի էս քաղաքը….»
Երեկ էլ Facebook-ի օգտատեր Հրանտ Տեր-Աբրահամյանի էջում Արթուր Սարուխանյանի հասցեին են արտահայտվել. «Միշտ էլ ցանկացածս կարող ենք սխալվել, տաք վիճակում ինչ–որ բաներ ասել, բայց նաև պետք ա մտածենք չէ՞, ինչ ենք ասում ու, չնայած անձամբ ինձ հասցեագրված չի իր ասածը, ես ինձ վիրավորված եմ զգում»,- ասաց Հրանտ Տեր-Աբրահամյանը:
«Մենք ենք այս քաղաքի տերը» և «Թռչկան» քաղաքացիական նախաձեռնությունների անդամ Գրիգոր Ղազարյանը մեզ հետ զրույցում ասաց, որ իրենք արդեն արձագանքել են հաղորդագությամբ և համապատասխան մարմիններից պահանջել են լուրջ կադրային փոփոխություններ, որպեսզի քաղաքացիներին անտեղի անվանարկող և բացահայտ լկտի վիրավորանքներ տեղացող անձինք ոչ միայն պատասխանատվության ենթարկվեն, այլև մեկընդմիշտ հեռացվեն պետական կառավարման համակարգից: «Եթե պաշտոն զբաղեցնող անձը վիրավորանք է գրում հանրային ակտիվիստների հասցեին, պետք է պատասխանատվություն կրի»,- ասաց նա:
«Մենք ենք այս քաղաքի տերը» նախաձեռնության անդամ Գայանե Մելքումյանն էլ «Առաջին լրատվականի»–ի հետ հետ զրույցում դատապարտելի համարեց քաղաքապետարանի աշխատակիցների վարմունքը. «Նրանք իրավունք չունեն ի պաշտոնե նման արտահայտություններ թույլ տալ և պետք է առնվազն հրապարակային ներողություն խնդրեն: Քաղծառայողներն աշխատավարձ են ստանում մեր հարկերից, և մենք հարկ չենք տալիս, որ նրանք ժողովրդին հայհոյեն»:
«Առաջին լրատվական»–ը Երևանի քաղաքապետարանի տեղեկատվության և հասարակայնության հետ կապերի վարչության աշխատակից Արթուր Սարուխանյանից փորձեց այս առնչությամբ մեկնաբանություններ ստանալ: Նրանից հետաքրքրվեցինք, թե պատրաստվու՞մ է արդյոք ներողություն խնդրել: Վերջինս հրաժարվեց որևէ մեկնաբանություն տալ՝ դա պայմանավորելով նրանով, որ զանգահարել ենք ոչ աշխատանքային օր, բայց, այնուամենայնիվ, շեշտեց, որ իր պատասխանները ոչ թե համարժեք են եղել, այլ մի բան էլ՝ մեղմ. «Այսինքն եթե մարդուն համարում ես ստրկամիտ, կաշառակեր և նման որակումներ անում, այդ մարդը համարժեք պատասխանի իրավունք ունի»:
Երևանի քաղաքապետարանի տեղեկատվության և հասարակայնության հետ կապերի բաժնի պետ Շուշան Սարդարյանի հետ էլ չկարողացանք կապվել:
Նա մեր զանգերին ողջ օրը չպատասխանեց:
