Ուիթնի Հյուսթոնի նախկին սկանդալային ամուսին Բոբի Բրաունը նույնիսկ նախկին կնոջ հրաժեշտի արարողության ժամանակ, քիչ է մնացել, որ դառնա լուրերի գլխավոր հերոսը: Նա սգո արարողությունը լքել է մինչ ավարտը, որովհետև իր ասելով` այլևս չէր կարողանում դիմանալ թիկնապահների ճնշումներին:
Բոբի Բրաունը հավաստում է, որ արարողության հենց սկզբից իրեն հանգիստ չեն տվել. երեք անգամ պահանջել են այլ տեղ նստել: Բացի այդ, նրան մերժել են Բոբի Քրիստինա Բրաունի` իր և Հյուսթոնի աղջկա հետ հանդիպել:
«Ես չեմ կարողանում հասկանալ թիկնապահների նման պահվածքը,-հայտարարել է երգիչը,- Ստեղծված իրավիճակում ես որոշեցի համբուրել իմ նախկին կնոջ դագաղը և հեռանալ, քանի որ չէի ուզում տեսարաններ ստեղծել»:
Նրա խոսքերով հանգուցյալին դուր չէր գա այն, թե ինչպես են վարվում իր հետ: «Ես կասկածում եմ, որ նա դա կցանկանար: Ամեն դեպքում, ես կհարգեմ իմ կնոջ հիշատակն այնքան, որքան կկարողանամ»,- խոստացավ Բրաունը:
Ուիթնի Հյուսթոնը և Բոբի Բրաունը ամուսնացած են եղել 15 տարի: Մինչ ամուսնալուծությունը /2007 թվական/ նրանց ընտանեկան կյանքում անպակաս էին սկանդալները, ինչն, ինչպես հավաստում են երգչուհու երկրպագուները, Հյուսթոնի համար դարձել էր ստեղծագործական ճգնաժամի և թմրանյութերով ու ալկոհոլով տարվելու պատճառ:
Ամուսնալուծությունից հետո դստեր խնամքի իրավունքը ստացավ Ուիթնի Հյուսթոնը: Նախկին ամուսինը փորձել էր դատարանի միջոցով վերադարձնել հայրական իրավունքները, սակայն նրան մերժել էին թմրանյութերի հանդեպ ունեցած հակման պատճառով: Այս մասին հաղորդում է ИТАР-ТАСС-ը:
