ՀՀՇ վարչության նախագահ Արամ Մանուկյանը, ով Հրազդանի քաղաքապետի ընտրությունների ժամանակ 25/21 ընտրատեղամասում ականատես էր եղել կաշառք տալու-վերցնելու դեպքի, երեկ կանչվել է ՀՔԾ՝ սեփական հաղորդման հիման վրա հարցաքննության: Այս մասին «Առաջին լրատվական»-ի հետ զրույցում ասաց ինքը՝ Արամ Մանուկյանը:
«Դեռ ընտրությունների օրը՝ փետրվարի 12-ին, տեղամասում հարցաքննվել են Հրազդանի քաղաքապետ Արամ Դանիելյանի կաշառք տվող վստահված անձը, Հելսինկյան ասոցիացիայի անկախ դիտորդը, ինչպես նաև մեկ լրագրող: Այս պահին իմ հաղորդման հիման վրա հարուցված քրեական գործը նախաքննության փուլում է, և շատ բան չեմ ուզում ասել՝ չխանգարելու քննության ընթացքին: Պարզապես բոլոր նրանք, ովքեր այս գործի հետ կապված տեղեկություններ ունեն, կանչվելու են դատախազություն:
Ես ՀՔԾ-ում անձամբ ասել եմ, որ պատրաստ եմ ամեն բանով գործին աջակցել, լինելու եմ հետևողական: Ինձ համար շատ սկզբունքային հարց է՝ բացահայտելու ընտրակաշառքի դերը հատկապես այսպիսի ընտրություններում, որտեղ ընտրակաշառքը մասսակայան բնույթ էր կրում և վճռական դեր խաղաց ընտրությունների ֆորմալ ելքի վրա: Գործը մինչև վերջ բացելու, կաշառք տվողներին ու վերցնողներին պատժելու հարցում հետևողական են լինելու նաև այն մարդիկ, ովքեր տեսել ու արձանագրել են այս ամենը: Ես կուզեմ, որ այս գործում հետևողական լինեն բոլորը, քանի որ կաշառքի երևույթն ընտրությունների առանցքում է և որոշիչ դեր ունի»,- ասաց Արամ Մանուկյանը:
Ամփոփելով՝ նա նշեց, որ կաշառք վերցնող մարդուն հիմա էլ է զոհ է համարում, բայց մյուս կողմից էլ պարտավորվածություն է զգում պաշտպանել այն 12 հազար հրազդանցիներին, ովքեր եկել, ձայն են տվել ՀԱԿ թեկնածու Սասուն Միքայելյանին, բայց որևէ արդյունքի չեն հասել հենց կաշառակերների պատճառով: