Թուրքական Haber 7 կայքի փոխանցմամբ՝ Թուրքիայի նախագահ Աբդուլլահ Գյուլը երեկ երեկոյան հաստատել է Թուրքիայի Ազգային մեծ ժողովի (ԹԱՄԺ) ընդունած ու իր հաստատմանը ներկայացված Պետական հետախուզական ծառայությանն ու Ազգային հետախուզական կազմակերպությանը (MIT) առնչվող օրենքում ուղղումներ մտցնելու մասին օրինագիծը:
Թուրքիայի Սահմանադրության համաձայն՝ Գյուլը տվյալ օրինագծի վերաբերյալ որոշում կայացնելու համար իր տրամադրության տակ ուներ 15 օր: Օրինագծի համաձայն՝ MIT-ի աշխատակիցների կամ էլ վարչապետի կողմից հատուկ հրահանգներ ստացած (MIT-ը չներկայացնող) մարդկանց կողմից իրենց առաջադրանքների կատարման ժամանակ հանցագործություն գործելու համար հետաքննություն պետք է իրականացվի վարչապետի թույլտվությամբ:
Հիշեցնենք, որ ԹԱՄԺ-ում 12.5-ժամյա քննարկումներից հետո՝ երեկ օրինագծի օգտին քվեարկել է 266 պատգամավոր, իսկ դեմ՝ 63: Օրինագծի վերջնական քննարկումը ԹԱՄԺ-ում նախատեսված է փետրվարի 21-ին, ժամը 15.00-ին: Օրենքը կունենա հետադարձ ուժ:
