Ադրբեջանական 1news.az-ի փոխանցմամբ՝ Թուրքիան դեռ սպասում է Ադրբեջանի կողմից թուրք ձեռնարկատերերի համար անցագրային ռեժիմի վերացմանը, ինչը հնարավորություն կտա ավելացնել երկու երկրների միջև ապրանքաշրջանառության ծավալը: Այս մասին Թբիլիսիում կայացած թուրք-վրաց-ադրբեջանական գործարար ֆորումի ժամանակ հայտարարել է Թուրքիայի էկոնոմիկայի նախարար Զաֆեր Չաղլայանը.
«Թուրք գործարարներին պետք է հնարավորություն ընձեռվի առանց անցագրի մուտք գործել Ադրբեջան, ինչպես որ Թուրքիա այցելելու հարցում ադրբեջանցի գործարարների պարագայում է: Մենք մեկ ազգ ենք, երկու պետություն: Մենք ունենք նույն պատմությունը, մշակույթը, հավատը: Այդ տեսանկյունից մեզ ոչինչ չի բաժանում:
Թուրքիայի ու Ադրբեջանի միջև համագործակցությունն առավել սերտացնելու համար անհրաժեշտ է վերացնել առկա խոչընդոտները: Դա մասնավորապես վերաբերում է անցագրային ռեժիմի վերացմանը: Ներկայումս Թուրքիան վերացրել է 63 երկրների, այդ թվում՝ նաև Ռուսաստանի հետ անցագրային ռեժիմը, ինչդեռ Ադրբեջանի պարագայում հարցը բաց է մնում:
Ինչպես որ թուրք և վրացի քաղաքացիներն են միմյանց այցելում սովորական անձնագրերով, նույնը պետք է լինի նաև Ադրբեջանի պարագայում: 2014 թվականին ամբողջովին կսկսի գործել «Բաքու-Թբիլիսի-Կարս» երկաթուղին, որի մի ճյուղը («Կարս-Իգդիր-Նախիջևան») կձգվի դեպի Նախիջևան»:
Հիշեցնենք, որ 2008 թվականին Թուրքիան միակողմանիորեն վերացրել է Ադրբեջանի հետ գործող անցագրային ռեժիմը։
Ի դեպ, նախորդ տարվա ամռանն Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը թուրքական Today’s Zaman թերթին տված հարցազրույցում Ադրբեջանի ու Թուրքիայի միջև գործող անցագրային ռեժիմի չվերացման հարցում մեղադրել էր Իրանին.
«Մենք ոչ մի խնդիր չենք տեսնում Թուրքիայի հետ անցագրային ռեժիմի վերացման հարցում, սակայն Իրանը խոչընդոտում է դրան՝ պահանջելով նույնն անել իր նկատմամբ։ Հակառակ դեպքում Իրանը զգուշացրել է, որ կկտրի Նախիջևանի ու Ադրբեջանի միջև ցամաքային կապը։ Ադրբեջանը պետք է միաժամանակ անցագրային ռեժիմը վերացնի Թուրքիայի ու Իրանի հետ։ Սակայն ես չեմ կարծում, թե տվյալ փուլում Ադրբեջանի կառավարությունը պատրաստ է այդ քայլին գնալուն»։
Հասանովը, սակայն, հետագայում հերքել էր իր խոսքերը՝ ընդգծելով, որ ինքը միայն նկատի է ունեցել, որ Թուրքիայի հետ գործող անցագրային ռեժիմի վերացումը կարող է դերակատարում ունենալ նաև Իրանի հետ միաժամանակ անցագրային ռեժիմի վերացման հարցում։
