News Georgia-ի փոխանցմամբ, Թբիլիսիում՝ Վրաստանի մշակույթի ու հուշարձանների պահպանության նախարարության շենքում, բացվել է չերքեզական մշակույթի կենտրոն: Կենտրոնը զբաղվելու է չերքեզների, ինչպես նաև կովկասյան այլ ժողովուրդների պատմության ու մշակույթի հետազոտությամբ ու տարածմամբ:
Բացման արարողությանը ներկա են եղել սփյուռքի հարցերով պետնախարար Միրզա Դավիթայան, սփյուռքի հարցերով խորհրդարանական կոմիտեի նախագահ Նուգզար Ցիկլաուրին, մշակույթի փոխնախարար Դավիթ Ցխադաձեն, ինչպես նաև հայտնի գիտնական-կովկասագետներ ու հատուկ հյուրեր Կովկասից:
Իր ելույթում Դավիթայան հայտարարել է. «Վրաստանի ղեկավարությունն օգնության ձեռք է մեկնում չերքեզ ժողովրդին՝ Թբիլիսիում ստեղծելով կովկասյան մշակույթի հիմնական կենտրոններից մեկը, որպեսզի նրանք կարողանան պահպանել իրենց լեզուն, մշակույթն ու ինքնությունը: Գտնվելով վտարման մեջ՝ նրանց համար դա անելը բարդ է»:
Հիշեցնենք, որ նախորդ տարվա մայիսի 20-ին Վրաստանի խորհրդարանը 1763-1864 թվականներին Ցարական Ռուսաստանի կողմից չերքեզների նկատմամբ իրականացված զանգվածային սպանություններն ու բռնագաղթը միաձայն ցեղասպանություն ճանաչեց: Դրանով Վրաստանը համարձակ քայլ կատարեց` դառնալով աշխարհի առաջին երկիրը, որը նման քայլի է գնում մոտ 150 տարի առաջ տեղի ունեցած դեպքերի առումով: Վրաստանում չերքեզների ցեղասպանության հուշարձանը տեղադրվելու է 2012 թվականի մայիսին, սևծովյան Անակլիա հանգստավայրում՝ Աբխազիայի սահմանի մոտ։