«Նաիրիտն» այսօր Միջպետական բանկի սեփականությունն է: Գործարանը կառավարող «Ռայնովիլ» ընկերությունը 70 մլն դոլար պարտքը պետք է մարեր, բայց չի մարել, և քանի որ այն գրավ էր դրված, ուստի դարձել է բանկի սեփականությունը: Այսօր լրագրողների հետ հանդիպման ժամանակ ՀՀ էներգետիկայի և բնական պաշարների նախարար Արմեն Մովսիսյանը տեղեկացրեց, որ մի քանի ընկերություններ, որոնք շահագրգռված են «Նաիրիտի» ծրագրով, ուսումնասիրել են զարգացման ծրագիրը, ինչից հետո հետաքրքրությունն ավելի է մեծացել: Այժմ անկախ փորձագիտական փորձաքննության հերթական փուլն է:
Ա. Մովսիսյանի խոսքով՝ դրական արդյունքի դեպքում շահող ընկերությունը կսկսի ծրագրի իրականացումը: Այն ներառում է նաև վարկի մարում և բոլոր ծրագրային խնդիրների լուծում:
Ա.Մովսիսյանը հերքեց, որ կառավարությունը երաշխիք էր տվել «Ռայնովիլ» ընկերությանը. «Կառավարության և միջպետական բանկի միջև պայմանագիրը միայն համաձայնագիր էր և ոչ թե երաշխիք»:
«Առաջին լրատվական»-ի հարցերին` գործարանում կրճատումներ նախատեսվո՞ւմ են, թե՞ ոչ, և ի՞նչ վիճակ է՝ կապված աշխատավարձերի հետ, Ա. Մովսիսյանը պատասխանեց` կառավարչի հաստատումից հետո կրճատումներ կլինեն. «3000-ի մեջ մոտ 400 կրճատումը մեծ թիվ չէ»: Ներկայում աշխատավարձի գծով կուտակվել է շուրջ 5 ամսվա պարտք, և, ըստ նախարարի, 1.5 ամսվա պարբերականությամբ փորձում են մեկ ամսվա աշխատավարձ վճարել: Աշխատավարձի ամբողջ պարտքի մարումը նույնպես ընդգրկված է ծրագրում:
