Փետրվարի 15-ին Ազգային ժողովի ՀՀԿ խմբակցության ղեկավար Գալուստ Սահակյանն ընդունել է Հայաստանի Հանրապետությունում Ուկրաինայի դեսպան Իվան Կուխտային:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ երկուստեք բարձր գնահատելով Հայաստանի և Ուկրաինայի միջև քաղաքական-տնտեսական կապերի, միջխորհրդարանական հարաբերությունների շարունակական զարգացումն ու ամրապնդումը, կողմերն արձանագրել են, որ երկու երկրների համակողմանի փոխգործակցության հնարավորությունները շատ ավելի մեծ են, որոնք տարբեր համատեղ ծրագրերի իրականացմամբ, հետևողական քայլերով պետք է կյանքի կոչել:
Ուկրաինայի դեսպանը գոհունակություն է հայտնել միջխորհրդարանական կապերի ակտիվացման ու խորհրդարանական դիվանագիտության ասպարեզում համագործակցության նկատելի առաջընթացի համար և շնորհակալություն հայտնել, որ միջազգային կառույցներում հայ խորհրդարանականները պաշտպանում են ուկրաինական պատվիրակությունների դիրքորոշումներն ու աջակցում նրանց:
Դեսպանի խնդրանքով Գ. Սահակյանը ներկայացրել է Ընտրական օրենսգրքի բարեփոխումները, համամասնական ու մեծամասնական ընտրակարգերի վերաբերյալ քաղաքական ուժերի տարբեր դիրքորոշումները` տեղեկացնելով, որ Ազգային ժողովում այդ թեմայով խորհրդարանական լսումներ են ընթանում:
Նա ներկայացրել է իրենց կուսակցության քաղաքական սկզբունքն առաջիկա խորհրդարանական ընտրությունները բարձր մակարդակով անցկացնելու վճռականության մասին, որը ոչ միայն երկրի կայունության ու զարգացման նախադրյալ կլինի, այլև ավելի կամրապնդի միջազգային կառույցներում Հայաստանի դիրքն ու հեղինակությունը:
«Քաղաքական դաշտն ու մթնոլորտը Հայաստանում այնպիսին է, որ բոլոր քաղաքական ուժերը լիարժեք կարող են դրսևորել իրենց հնարավորությունները»,- նշել է Գ. Սահակյանը:
Հանդիպման ժամանակ քննարկվել են նաև երկու երկրների մշակութային կապերի զարգացմանը, Ուկրաինայում հայկական համայնքի կենսական խնդիրներին, հայկական հուշարձանների պահպանությանն առնչվող ու երկկողմ հետաքրքրություն ներկայացնող այլ հարցեր:
