Ինձ համար ցավալի է, որ տղամարդը հասունանում է 60 տարեկանում և նոր միայն որոշում` որ կուսակցություն է ուզում մտնել: Այսօր կայացած մամուլի ասուլիսի ժամանակ այս մասին հայտարարեց ՀՀՇ նախագահ Արամ Մանուկյանը` անդրադառնալով ՀՀ նախկին արտգործնախարար Վարդան Օսկանյանի` ԲՀԿ-ին անդամակցելու դիմումին:
«Սա թեթևսոլիկ մոտեցում է: Նա միայն հիմա է հասունանում, նա ուղղակի խաղալիք է, և պարզ է, որ այս քայլը Օսկանյանին թելադրված է: Ցավալի է, որ այդ մարդը տեր է փնտրում: Եթե ստրուկն ուզում է ստրուկ մնալ, ցավալի է»,- ասաց Մանուկյանը:
Պատասխանելով հարցին` ո՞րն է փետրվարի 17-ին կայանալիք հանրահավաքը հետաձգելու պատճառը, ՀՀՇ գործիչը նշեց, որ այն տասը օրով հետաձգելը սարսափելի չէ, իրական պատճառն ուղղակի ցուրտն է:
«Հրազդանյան ընտրություններից հետո ես ինքս էլ հիմա մրսած եմ ու ջերմություն ունեմ»,- ասաց Մանուկյանը:
Ամփոփելով` նա նշեց, որ ՀԱԿ-ի ցուցակները դեռևս պատրաստ չեն, ինքը ևս որոշում չունի իր առաջադրման մասին: