ԱԺ-ում քիչ առաջ մեկնարկեցին համամասնական ընտրակարգի վերաբերյալ խորհրդարանական լսումները: Այն բացեց ԱԺ պետաիրավական հարցերի նախագահ Դավիթ Հարությունյանը:
ԱԺ նիստերի դահլիճում են Հայ ազգային կոնգրեսի, «Ազատ դեմոկրատներ» կուսակցության ներկայացուցիչները, Պարույր Հայրիկյանը, Խոսրով Հարությունյանը, ինչպես նաև խորհրդարանական ուժերը` ՀՀԿ, ԲՀԿ, ՀՅԴ, «Ժառանգություն» կուսակցությունների անդամները, նաև հասարակական կազմակերպությունների ներկայացուցիչներ:
ԱԺ նախագահ Սամվել Նիկոյանը իր ելույթում ողջունեց արտախորհրդարանական ուժերին, հասարակական կազմակերպությունների ներկայացուցիչներին, ապա նկատեց՝ ընտրությունները կլինեն համամասնական, թե մեծամասնական ընտրակարգով, միևնույն է՝ դա չի ազդում ընտրությունների որակի վրա: Նա առաջարկեց խորհրդարանական մարմին ստեղծել, որը կհետևի ընտրությունների ընթացքին: Իր ելույթից հետո Սամվել Նիկոյանը լքեց ԱԺ նիստերի դահլիճը` մաղթելով առողջ, քաղաքակիրթ քննարկում:
Հիմնական զեկույցով հանդես եկավ օրենսդրական նախաձեռնության հեղինակ, ՀՅԴ խմբակցության պատգամավոր Արմեն Ռուստամյանը: Նա նշեց, որ քաղաքական ուժերը պաշտոնապես արդեն իսկ դրական գնահատական են տվել իրենց առաջարկությանը:
«Միայն ՀՀԿ-ն է ասում, որ այսօր դրա ժամանակը չէ: Հիմք չի կարելի ընդունել այն համոզմունքը, թե վերջին պահին չի կարելի փոփոխել ընտրակարգը: Բոլոր ժողովրդավարական երկրներում տեղի են ունենում ժողովրդավարական ընտրություններ, իսկ մեզ մոտ մեծամասնական ընտրակարգի ընտրությունները ծառայում են իշխանության վերարտադրմանը:
Հայաստանում մեծամասնական ընտրակարգը հակաժողովրդավարական է: Անկախությունից ի վեր իշխանությունները վերընտրվել են»,- նշեց նա՝ հավելելով, որ Սահմանադրությամբ ամրագրված՝ ժողովուրդն է ձևավորում իշխանություն սկզբունքն է խախտվում:
«Եթե այս ընտրակարգն է մնալու` եկեք աճուրդ հայտարարենք, ասենք՝ ով շատ կվճարի` նա կընտրվի, էլ ժողովրդին չփչացնենք: Իշխանությունը միշտ ունենում է 70 տոկոս ապահովված մեծամասնություն, այդ իսկ պատճառով ՀՀԿ-ն ատամներով պահում է մեծամասնական ընտրակարգը»,- ասաց նա: