«Ըստ երեկ տարածված հաղորդագրության` Հայաստանի ապահովագրողների բյուրոն բարձրացրել է ապահովագրական փոխհատուցման սահմանաչափերը: Եթե նախկինում վթարի պատճառով մեքենային հասցված վնասը փոխհատուցվում էր առավելագույնը 1.5 միլիոն դրամի չափով, այսուհետ առավելագույն չափը կլինի 1 մլն 800 հազար դրամ: Պատահարի հետևանքով մահացածի հուղարկավորության համար փոխհատուցումը կկազմի 1 մլն դրամ, նախկին 650 հազարի փոխարեն: Առողջությանը հասցված վնասի փոխհատուցման առավելագույն գումարը նախկին 3 մլն դրամից հասցվել է 3 միլիոն 300 հազարի:
Եթե մեկ պատահարի հետևանքով վնաս է պատճառվել մի քանի անձանց, բոլորի կրած վնասների փոխհատուցումը միասին այսուհետ կկազմի առավելագույնը 10 միլիոն դրամ` նախկին 9-ի դիմաց: Այս փոփոխությունները տարածվում են 2012-ի հունվարի 1-ից հետո տեղի ունեցած պատահարների վրա»,- գրում է «ՀԺ»-ն և հավելում.
«Այս առատաձեռնությունը պայմանավորված է նրանով, որ ԱՊՊԱ ընկերությունների ընդհանուր եկամտաբերությունը 2011-ին կազմել է ավելի քան 50 տոկոս: Ավտոմեքենաների սեփականատերերը ընկերություններին վճարել են ավելի քան 14 միլիարդ դրամ, իսկ ընկերությունները պատահարների համար փոխհատուցել են 7 միլիարդ: Այլ կերպ ասած` ապահովագրական ընկերությունների ընդհանուր եկամուտը կազմել է 7 միլիարդ դրամ:
Սա նշանակում Է, որ ՍՊՊԱ-ն գերեկամտաբեր բիզնես Է, որի համար ստիպողաբար վճարում են ՀՀ քաղաքացիները: Անցած տարեվերջին այս թեմայով դժգոհություն բարձրացավ մամուլում: Ակնհայտ էր, որ ապահովագրավճարները պետք է նվազեցվեին: Սակայն ապահովագրողների բյուրոն գնաց այլ ճանապարհով` ավելացրեց փոխհատուցումների չափը: Ըստ դիտորդների` դա ամենևին չի նվազեցնի ապահովագրող ընկերությունների եկամտաբերությունը:
Իսկ որ ապահովագրավճարները չնվազեցվեցին, ունի հստակ պատճառ. դրանց շնորհիվ Հայաստանում արձանագրվում է ՀՆԱ-ի արհեստական աճ` չնայած տնտեսության համար դա ոչ մի նշանակություն չունի: Նվազեցնելով ապահովագրավճարների չափը` տնտեսական «աճի» ցուցանիշը կարող է տուժել: Այդ իսկ պատճառով ոչ թե նվազեցվել են ապահովագրավճարների չափերը, այլ բարձրացվել են փոխհատուցումների առավելագույն չափերը»:
