Չեխ հայտնի գեղանկարիչներ Ռոման Շվեյդան և Լուկաշ Գավլովսկին ուրբաթ օրը Պրահայի Ազգային թատրոնի դիմաց տեղադրել են վերջերս մահացած Չեխիայի առաջին նախագահ Վացլավ Հավելի սրտի խորհրդանշական մոմե քանդակը: Այս մասին հաղորդում է RIA-Novosti-ն՝ վկայակոչելով չեխական մամուլը:
Քանդակի հումքը այն մոմերի մնացորդներն էին, որոնք Վացլավի հրապարակում և տարբեր քաղաքներում ու գյուղերում նրա մահվան օրը վառել էին չեխերը:
Նկարիչները քանդակը հատուկ պատրաստել են բաց սրտի տեսքով. կարելի է դրա մեջ մտնել և ներսից դիտել այն:
«Օգտագործված նյութում մենք շատ լույս ենք տեսնում: Այդ մոմերում մարդկանց պատկերացումներն են իրական հասարակության մասին, հույս առ այն, որ միշտ կարելի է գործել արդար և սեփական պատկերացումներին համապատասխան: Դա այն հույսն է, որ քաղաքականությունը չպետք է լինի կեղտոտ զբաղմունք»,- ասել է քանդակի հեղինակներից Լուկաշ Գավլովսկին:
Նրա խոսքերով՝ քանդակի քաշը 2 տոննա է: Ակցիայի կազմակերպիչները հույս ունեն, որ մոմը կմնա մինչև գարուն, և եղանակը թույլ կտա քանդակը պահել երկու ամիս՝ մինչև ապրիլի 10-ը:
Ազգային թատրոնում քանդակի բացմանը ներկա է եղել առաջին նախագահի կինը՝ Դագմար Հավլովան, նրա ընկերները և համախոհները:
Քանդակի հետագա ճակատագիրն առայժմ հայտնի չէ: Հնարավոր է, որ այն տեղադրվի որևէ թանգարանում, հնարավոր է և հումք դառնա արվեստի այլ նմուշների համար: Չի բացառվում, որ հեղինակները քանդակի մասերը որպես հիշատակ բաժանեն ցանկացողներին:
Վացլավ Հավելը միշտ ստորագրում էր ամբողջ անունով՝ Vaclav Havel, ի նշան սիրո կողքին կարմիր սիրտ նկարելով: Հավելը մահացել է 2011թ. դեկտեմբերի 18-ին:
