«Ազատ դեմոկրատներ» կուսակցության վարչության նախագահ Խաչատուր Քոքոբելյանը խոստանում է երկուշաբթի կայանալիք մամլո ասուլիսում սպառիչ պատասխաններ տալ մի շարք հարցերի, այդ թվում՝ նախընտրական հնարավոր դաշինքի վերաբերյալ: «Առաջին լրատվական»-ի հետ զրույցում այս մասին հայտարարեց ինքը՝ Քոքոբելյանը:
«Իսկ ընդհանրապես, նախընտրական դաշինք պատկերացնում ենք գաղափարական հիմքի վրա, այնպիսի հարցերի շուրջ, ինչպիսին արդար ընտրություններն են, մարդու իրավունքների պաշտպանությունը և այլն: Արդար ընտրությունների պահանջը հասարակական պահանջարկ է: Դրան պաշտպանելը քաղաքական ցանկացած ուժի սրբազան պարտքն է, և այս հարցերի շուրջ պատրաստ ենք համագործակցել բոլոր այն կուսակցությունների հետ, որոնք անկեղծորեն դրա համար պայքարում են կամ ցանկություն ունեն պայքարելու»,- ասաց նա:
Հարցին՝ հնարավոր համարո՞ւմ է, որ «Ազատ դեմոկրատները» և ՀՅԴ-ն նախընտրական դաշինք կազմեն, Խաչատուր Քոքոբելյանն ասաց. «Մեր միջև գաղափարական ընդհանրություն պարզապես անհնարին է և անհամատեղելի, բայց սա չի նշանակում, որ երկու կուսակցությունները շատ հարցերում՝ կոռուպցիա, դատական համակարգի անկատարություն, արտագաղթ և այլն, չեն կարող համագործակցել»:
Նշենք, որ նախօրեին տեղի ունեցած մամլո ասուլիսի ժամանակ «Ժառանգություն» կուսակցության ղեկավար Րաֆֆի Հովհաննիսյանը չէր բացառել ՀՅԴ-ի հետ համագործակցությունը: Հատկանշական է, որ նմանօրինակ հայտարարությամբ հանդես եկած ազատական կուսակցության հետ ներկայումս բանակցություններ է վարում նաև «Ազատ դեմոկրատները»:
