«Հայկական ժամանակ» օրաթերթի թողարկման պատասխանատու Հայկ Գևորգյանի կալանավորման հարցը պետք է քաղաքացիական և լրագրողական հանրության ուշադրության կենտրոնում լինի: «Առաջին լրատվական»-ի հետ զրույցում նման տեսակետ հայտնեց «Կենտրոն» հեռուստատեսության «Էպիկենտրոն» լրատվական ծրագրի ղեկավար, լրագրող Պետրոս Ղազարյանը:
Ըստ Ղազարյանի, թեև լրատվամիջոցը բազում անգամ հրապարակումներով է հանդես եկել իր դեմ, բայց ինքը որպես լրագրող ճանաչում և գնահատում է Հայկ Գևորգյանին: «Այն փաստարկները, որոնք ներկայացնում է ոստիկանությունը, ավելի շատ հարցեր են առաջացնում, քան հարցերին պատասխաններ են տալիս: Նույնիսկ եթե եղել է նման դեպք, շատ կարևոր է, թե ինչպես է տեղի ունեցել այդ դեպքը: Ի՞նչ է նշանակում տաս օր առաջ է տեղի ունեցել և ի՞նչ է նշանակում տաս օր հետախուզման մեջ է՝ այն դեպքում, երբ մարդը հանգիստ իր լրագրողական գործունեությունն է ծավալել»,- ասաց Պ. Ղազարյանը:
Ըստ նրա՝ հաճախ ականատեսն ենք դառնում, թե ինչպես թիկնապահները կարող են մարդ սպանել և չկալանավորվել, իսկ լրագրողը վրաերթի համար կալանավորվում է: Սա Պետրոս Ղազարյանը լրագրության նկատմամբ վերաբերմունք է որակում: Նրա կածիքով՝ հանրությունը պետք է պահանջի մաքսիմալ արդարություն, և հետամուտ լինի, որ հարցականներ չմնան: Իսկ ներկա վիճակը Հայկ Գևորգյանի կալանավորման շուրջ բազմաթիվ հարցականներ է առաջացնում:
Պետրոս Ղազարյանը նշեց, որ միջազգային զեկույցներից մեկում Հայաստանը խոսքի ազատության ցուցանիշով բարձրացել էր, և պետք չէր ամեն բան անել, որ այդ զեկույցում հաջորդ տարի Հայաստանը հայտնվի մի քանի նիշ ներքևում`այն դեպքում, որ թևակոխել ենք նախընտրական տարի: «Էպիկենտրոնի» ղեկավարի համոզմամբ` այս կալանավորումը խոսքի ազատության վրա բացասական է ազդելու և բոլոր լրագրողների պարտքն է արդարությունը պահպանելը:
«Դրա համար մենք պետք է հնարավորինս ուշադրության կենտրոնում պահենք այս հարցը: Պետք է հարցեր բարձրացնենք և ոստիկանությունից իրավաչափություն պահանջենք: Լրագրողական հանրությունը պետք է թույլ չտա, որ այսպիսի վերաբերմունք լինի լրագրողի նկատմամբ: Ոստիկանության փաստարկները մեզ չեն համոզում, սա է ամբողջ խնդիրը»,- նկատեց Պետրոս Ղազարյանը: Նա նաև տեղեկացրեց, որ «Էպիկենտրոն» լրատվականը խնդիրը կպահի հանրության ուշադրության կենտրոնում և կլուսաբանի:
Լրատվականի ղեկավարը նաև կարևորեց, որ պետք է հասկանալ՝ եթե որևէ մեկի խոսքի ազատությունը սահմանափակվում է, ապա բոլորի խոսքի ազատությունն է սահմանափակվում: Նրա խոսքով`եթե իրավունքներ են ոտնահարվում, ոտնահարվում են բոլորի իրավունքները, և պետք է եզրակացություններ անել փաստերից, իսկ փաստն այն է, որ ոստիկանության փաստարկները չեն համոզում:
Պետրոս Ղազարյանը կարծում է, որ Հայկ Գևորգյանի կալանավորման հիմքում ընկած միջադեպը ցանկացածի հետ կարող էր պատահել: Նա վերհիշեց երկու տարի առաջ տեղի ունեցած մի դեպք: «Ես ավտոմեքենայի ղեկին էի, մի տաքսու վարորդ ավտոմեքենայի ձայնային ազդանշանով ինձ հորդորեց կանգնեցնել ավտոմեքենան: Իջնելով մեքենայից` հարցրեցի, թե ինչ խնդիր կա, պատասխանեց, որ 20 օր առաջ իր ավտոյին խփել և թողել գնացել եմ: Ես նույնիսկ չէի հիշում, որ խփել եմ: Այսքան բանից հետո մտածում եմ, որ ես նույնպես հետախուզման մեջ եմ»,- կատակով ենթադրեց լրագրողը:
Նա կարծում է, որ պետք չէ ամեն գնով ոստիկանությանը սևացնել, որովհետև սևացած ոստիկանությունից հասարակությունը` ո՛չ լրագրողները, ո՛չ սովորական քաղաքացին, ո՛չ իշխանությունը, ո՛չ պետությունը չեն շահի: «Արդյո՞ք այս ամենի արդյունքում ոստիկանության նկատմամբ վերաբերմունքը լավացավ»,- հռետորական հարց բարձրացրեց «Էպիկենտրոն» լրատվական ծրագրի ղեկավար, լրագրող Պետրոս Ղազարյանը: