«Հայկական ժամանակ» օրաթերթի թողարկման պատասխանատու Հայկ Գևորգյանի կալանքը «Բարգավաճ Հայաստան» կուսակցության պատգամավոր Նաիրա Զոհրաբյանի համար, անակնկալ է: Այս մասին նա ասաց «Առաջին լրատվական»-ի հետ զրույցում:
«Կայքերում կարդացի նրա կալանքի մասին: Սա ինձ համար, իսկապես, անսպասելի էր: Գիտեք, որ ես շատ երկար տարիներ եմ աշխատել Հայկի հետ: Ավելին այս պահին չեմ կարող ասել: Ամեն դեպքում, ցավում եմ նրա համար և անկախ գաղափարական հայացքների տարբերությունից՝ իհարկե, ինձ համար շատ անսպասելի և ցավալի է Հայկի կալանքը»,- ասաց Նաիրա Զոհրաբյանը:
Հիշեցնենք, որ այսօր տանից դուրս գալու պահին քաղաքացիական հագուստով անձինք, ոլորելով «Հայկական ժամանակ» օրաթերթի թողարկման պատասխանատու Հայկ Գևորգյանի ձեռքերը՝ նրան տարել են անհայտ ուղղությամբ։ Ոստիկանության հաղորդմամբ, Հայկ Գևորգյանը հունվարի 23-ից գտնվել է հետախուզման մեջ՝ իբր ինչ-որ քաղաքացու վրաերթի ենթարկելու կասկածանքով:
Հայկ Գևորգյանն այժմ «Նուբարաշեն» ՔԿՀ-ում է:
