«Ժառանգություն» կուսակցության համագումարը տեղի կունենա մարտի 2-ին, և հենց այդ համագումարում էլ կորոշվի կուսակցության` առաջիկա ընտրությունների մասնակցության ձևաչափը: Այսօր կայացած մամուլի ասուլիսի ժամանակ այս մասին ասաց «Ժառանգության» ղեկավար Րաֆֆի Հովհաննիսյանը:
«Բոլոր համապատասխան եզրահանգումները կամփոփվեն և կներկայացվեն չորս շաբաթ անց»,- ասաց նա:
Հովհաննիսյանի խոսքով՝ մինչ այդ «Ժառանգությունը» մտնում է մի փուլ, ուր պիտի որոշի՝ ինչպես է դիտարկում ընտրություններին իր մասնակցությունը և արդյոք օրակարգո՞ւմ է ԱԺ-ում հայտնվելու հարցը:
«Մենք ուզում ենք հավատալ, որ ՀՀ-ն գտնվում է լուրջ փոփոխությունների նախաշեմին, և մեր կուսակցությունը պարտավոր է մաս կազմել համակարգափոխական գործընթացին: Դրա համար էլ ողջունում ենք համամասնական ընտրակարգի անցնելու մասին լսումներ հրավիրելու ԱԺ որոշումը: Շատ լավ կլիներ, եթե ԱԺ նախագահը հանդիպեր նախաձեռնության հեղինակների և ՀՅԴ-ի, ԲՀԿ-ի ու «Ժառանգության», ինչպես նաև շահագրգիռ անձանց հետ:
Ներկա դրությամբ Հայաստանին համամասնական ընտրակարգ է անհրաժեշտ, իսկ մեծամասնականը գուցե պետք գա հիսուն տարի հետո: Առարկայական գնահատականը, կամքը կբերեն նրան, որ հայավայել սահմանադրական ընտրություններ կլինեն: Այդ համատեքստում «Ժառանգությունը» կքննի խոսքի և գործի համապատասխանության հարցը: Մենք ակնկալում ենք, որ իշխանությունները մի լավ բան ասելուց հետո կամք կունենան՝ խոսքը կյանքի կոչելու»,- հույս հայտնեց Հովհաննիսյանը:
Ամփոփելով` նա նշեց, որ կուսակցությունն իր մարտյան համագումարում պետք է որոշի` որքանով ենք գտնվում ազնիվ ու արդար ընտրությունների նախաշեմին:
