«Փրկենք Թեղուտը» նախաձեռնությունը քաղաքական նկրտումներ չունի: Այսօր լրագրողների հետ հանդիպման ժամանակ հայտնեց բնապահպան ակտիվիստ, «Փրկենք Թեղուտը» քաղաքացիական նախաձեռնության անդամ Գոռ Հակոբյանը` հավելելով, որ նախաձեռնությունը անկախ և ինքնուրույն շարժում է, որն իշխանության չի ձգտում:
Նա նշեց, որ նախաձեռնության նպատակը խնդիրը ներկայացնելն է և դրա լուծման այլընտրանքային տարբերակներ մշակելը: Ըստ բանախոսի` «Փրկենք Թեղուտը» ունի տարբեր աշխատանքային խմբեր:
«Բացի բնապահպանական խնդիրներից՝ կփորձենք այլ խնդիրներ ևս բարձրացնել` առողջապահական, աշխատատեղերի, հարկային»,- նշեց ակտիվիստը` հավելելով, որ ակտիվիստներից մեկը նախորդ շաբաթ Գերմանիայում հանդիպել է որոշ բնապահպանական կազմակերպությունների հետ:
Գոռ Հակոբյանի մեկնաբանմամբ` Քաջարանի հանքը շահագործող «Քրոնիմետ» գերմանական ընկերությունը Հայաստանում ևս պետք է ծրագրեր իրականացնի` հաշվի առնելով Գերմանիայի օրինական դաշտը:
Համատեղ ասուլիսի ընթացքում «Փրկենք Թեղուտը» քաղաքացիական նախաձեռնության անդամ Եղիա Ներսիսյանը խոսեց Մոսկվայում հայ համայնքի հետ կայացած հանդիպման մասին, որտեղ քննարկվել և ներկայացվել է Թեղուտի խնդիրը:
«Հայաստանում առաջին անգամ խնդիրը դուրս է գալիս ՀՀ սահմաններից. սա դրական երևույթ է և պետք է հուզի բոլոր հայերին: Մոսկվայում ոգևորված երիտասարդների ենք հանդիպել, նրանք պատրաստակամ են մասնակցելու ցանկացած գործողության»,- նշեց Եղիա Ներսիսյանը` հավելելով, որ արդյունքներ միանշանակ կլինեն:
Անդրադառնալով «Վալեքս գրուպի» տարածած այն հայտարարությանը, թե իրեն թույլ չեն տվել խոսել Մոսկվայում կայացած հանդիպման ժամանակ, ասաց, որ «Վալեքս գրուպի» ներկայացուցչին պարզապես չեն ցանկացել լսել:
Տեղեկացնենք, որ Մոսկվայում հանդիպման ժամանակ անսպասելիորեն այցելել է «Վալեքս գրուպի» աշխատակիցներից մեկը: Նա եկել և իր խոսքն է ցանկացել ասել և բանավիճել:
Անդրադառնալով հետագա անելիքներին` բնապահպան Եղիա Ներսիսյանը տեղեկացրեց, որ բնապահպանները լինելու են Կանադայում, Ֆրանսիայում և վստահ են, որ Թեղուտի խնդրի հարցում դրական արդյունքի կհասնեն:
