Թուրքական Doğan լրատվական գործակալությունը, վկայակոչելով ամերիկյան լրատվամիջոցներին, հայտնում է, որ Մերձավոր Արևելքում կարող են սկսվել սուննիների ու շիաների զանգվածային բախումներ, ինչը մեծ սպառնալիք է ներկայացնում Թուրքիայի համար:
Այդ ամենը կարող է հանգեցնել լայնամասշտաբ տարածաշրջանային պատերազմի, որի մի կողմում կգտնվեն Իրանը, Սիրիան և «Հըզբոլլահ»-ը, իսկ մյուս կողմում՝ Թուրքիան, Կատարը, Սաուդյան Արաբիան և այլ արաբական երկրներ:
Այս կապակցությամբ G2 Bulletin հետախուզական կայքը մեջբերում է այսպես կոչված «7 ազդանշան», որոնք մեծացնում են Մերձավոր Արևելքում լայնամասշտաբ պատերազմի հավանականությունը.
ա) Այն բանից հետո, ինչ Սաուդյան Արաբիան խոստացավ ավելացնել նավթի արդյունահանումն ու արտահանումը, ԵՄ-ը նավթային բեռնարգելք սահմանեց իրանական նավթի ներկրման վրա, ինչը հարուցեց իրանական կողմի դժգոհությունը,
բ) Սաուդյան Արաբիան և Կատարը հայտարարեցին, որ իրենք վճռել են զենքով օգնել Սիրիայի նախագահ Բաշար Ալ-Ասադի ռեժիմի դեմ պայքարող Սիրիայի Ազատ բանակին,
գ) Իրանը և «Հըզբոլլահ»-ը շարունակում են Ասադի ռեժիմին ցուցաբերել ամեն տիպի աջակցություն, «Հըզբոլլահ»-ի զինյալները շարունակում են մարտնչել սիրիական բանակի կազմում,
դ) Կատարը ցանկություն է հայտնել դեպի Սիրիա ուղարկել արաբական ռազմուժ,
ե) Սաուդյան Արաբիան որպես սիրիական երկրի ներկայացուցիչ է ճանաչել Սիրիայի Ազգային խորհուրդը,
զ) Սիրիայի նախագահի կին Ասման երկրից փախչելու փորձ է ձեռնարկել,
է) Թուրքիայի արտգործնախարար Ահմեդ Դավութօղլուն հայտարարել է, որ կան մի շարք ուժեր, որոնք ցանկանում են առաջ բերել տարածաշրջանային սառը պատերազմ, սակայն իրենք դա թույլ չեն տա:
Այս ամենին հավելվում է այն, որ եթե Իրանը ստեղծի միջուկային ռումբ, ապա նրա օրինակին կհետևեն Թուրքիան և Սաուդյան Արաբիան, ինչի արդյունքում տարածաշրջանը կհայտնվի միջուկային պատերազմի սպառնալիքի տակ:
Հիշեցնենք, որ օրեր առաջ էլ բրիտանական The Economist պարբերականը գրել էր, որ Թուրքիայի արտգործնախարար Ահմեդ Դավութօղլուն Իրանի դեմ սուննի բլոկ է ձևավորում. «Թուրքիան աջակցում է Սիրիայի նախագահ Բաշար Ալ-Ասադի ընդդիմադիրներին և «Մուսուլման եղբայրներ» կազմակերպությանը: Բացի այդ, Դավութօղլուն աջակցում է Իրաքի սուննիներին: Չպետք է մոռանալ նաև, որ Թուրքիան համաձայնեց իր տարածքում ՆԱՏՕ-ի ռադարի տեղակայմանը, որի թիրախում են Իրանը և Ռուսաստանը»: