Սոցիալական փաթեթի համար ՀՀ բյուջեով նախատեսված 18 մլրդ դրամի մեծ մասը կուղղվի բժշկական ապահովագրությանը: Ինչպես այսօր լրագրողների հետ հանդիպման ժամանակ հայտնեց ՀՀ ֆինանսների նախարար Վաչե Գաբրիելյանը, դրա կարիքը բնակչությունն առավել շատ ունի:
Պատասխանելով «Առաջին լրատվական»-ի հարցին՝ արդյոք բուժաշխատողները մտնում են պետծառայողների ցանկի մեջ և կարո՞ղ են օգտվել սոցփաթեթից, հաշվի առնելով, օրինակ, որ ուսուցիչներն ավելի բարձր աշխատավարձ են ստանում, քան պոլիկլինիկաների բժիշկները, Վ. Գաբրիելյանը հայտնեց, որ բուժաշխատողները չեն ներառվել ցանկում:
«Կրթության ոլորտից փաթեթում չեն ընդգրկվել նաև բուհերը, որովհետև թե՛ բուհերը, թե՛ հիվանդանոցները ունեն այլ եկամուտներ: Հիվանդանոցները, ի տարբերություն դպրոցների, ամբողջությամբ չեն ֆինանսավորվում պետբյուջեի հաշվին: Հիվանդանոցները և պոլիկլինիկաները ՊՈԱԿ-ներ չեն, ՓԲԸ-ներ են: Չեմ կարող բացատրել, թե կազմակերպչաիրավական այդ ձևն ինչու է տիրապետող առողջապահության համակարգում, բայց ոլորտն այդպիսին է»,- ասաց նախարարը:
Նախարարի կարծիքով՝ հնարավորինս հաշվի են առնվել կոռուպցիոն ռիսկերը, և դրա համար էլ արվում է ապահովագրական ընկերությունների միջոցով, որոնք ունեն նաև իրենց մեխանիզմները ստուգելու համար, իսկ պետական հիմնարկներում սերտիֆիկատների բաշխման ժամանակ կոռուպցիոն ռիսկերից խուսափելու համար մշակվել են հատուկ մեխանիզմներ:
Նրա խոսքով՝ սոցփաթեթի կիրառման արդյունքում գների նվազում չի սպասվում, բացի հանգստի կազմակերպման ոլորտից, որտեղ, սակայն, սպասումները երկակի են: Նախարարը հույս հայտնեց, որ տուրօպերատորները կմշակեն հատուկ առաջարկներ և մեծ առաջարկի դեպքում գները կնվազեն:
