Թուրքական Cumhuriyet թերթի փոխանցմամբ՝ քրդական «Խաղաղություն և ժողովրդավարություն» կուսակցության (ԽԺԿ) նախագահ Սելահաթթին Դեմիրթաշը դատի է տվել Թուրքիայի զինված ուժերի Գլխավոր շտաբի պետ Նեջդեթ Օզել:
Դեմիրթաշն Օզելին մեղադրում է «քաղաքական նապատակներ հետապնդող ելույթով հանդես գալու» (148-րդ հոդվածի խախտում) և «դատական մարմինների աշխատանքի վրա ազդելու» (277-րդ հոդվածի խախտում) մեջ:
Դեմիրթաշի համար Անկարայի 17-րդ դատարան դատական հայց ներկայացնելու հիմք է ծառայել այն, որ մոտ 1 ամիս առաջ Օզելը հայտարարել էր, թե իրենք իրենց օրակարգից վերացնելու են PKK (Թուրքիայում ահաբեկչական հռչակված ու արգելված Քրդստանի աշխատավորական կուսակցություն) անունը: Բացի այդ, Օզելը հայտարարել էր, որ նպատակահարմար չի համարում քրդերենով կրթություն ստանալը:
Հիշեցնենք, որ Նեջդեթ Օզելը քրդերի դեմ քիմիական զենք գործածելու համար Թուրքիայում հայտնի է «քիմիական Նեջդեթ» մականունով:
Իր վերոնշյալ ելույթում Օզելը նաև հայտարարել էր. «Վերջին 6 ամիսներին Թուրքիայի զինված ուժերի իրականացրած գործողությունների արդյունքում վնասազերծվել է 327 PKK-ական։
Ամեն անգամ, երբ PKK-ի ուժերը սպառվելու վրա են, նա հրադադարի մասին որոշում է ընդունում։ Ահաբեկչական գործունեության դադարեցմամբ՝ նրանք փորձում են թուլացնել իրենց վրա գործադրվող ճնշումը և ուժեր կուտակել։ Մենք մեր օրակարգից կջնջենք PKK անունը։
ԱՄՆ-ը շարունակում է այդ հարցում հետախուզական աջակցություն ցուցաբերել մեզ։ Ահաբեկչության դեմ պայքարի համար Ինջիրլիքի ռազմաբազայում տեղակայվել են ամերիկյան Predator տիպի 4 անօդաչու թռչող սարքեր, որոնք նախորդ տարվա նոյեմբերից սկսած թռիչքներ են իրականացնում դեպի Հյուսիսային Իրաք»։
