Ռեժիսոր Դարեն Արոնոֆսկին վերանայում է Ռասել Քրոուի թեկնածությունը` որպես իր նոր ֆիլմում Նոյի դերակատար: Այս մասին հայտնում է Deadlineը:
Արոնոֆսկու ֆիլմը դառնալու է աստվածաշնչյան Նոյյան տապանի պատմության շարունակությունը: Ավելի վաղ ռեժիսորը հայտարարել էր, որ ֆիլմի սցենարը բավականին դժվար է էկրանավորելու համար, այդ պատճառով Արոնոֆսկին սցենարի հիման վրա ստեղծել էր կոմիքսներ: Ռեժիսորին գրաֆիկական վեպ ստեղծելու գործում հետագայում օգնեց կանադացի նկարիչ Նիկո Հենրիխոնը:
Ենթադրվում էր, որ ֆիլմում Նոյի դերը կատարելու էր Քրիստիան Բեյլը: Սակայն վերջինս չափացանզ զբաղված լինելու պատճառով հրաժարվել էր մասնակցել ֆիլմի նկարահանումներին: Այնուհետև վերանայվել է Մայքլ Ֆասսբենդերի թեկնածությունը, սակայն այժմ ռեժիսորը ցանկանում է համագործակցել Քրոուի հետ: Բացի այդ, Արոնոֆսկին մտադիր է մեկ այլ դերի համար հրավիրել Լիամ Նիսոնին:
Պետք է նշել, որ Արոնոֆսկու նոր ֆիլմի սցենարի գրելու աշխատանքներին մասնակցել է Ջոն Լոգանը: Նա նախկինում աշխատել է «Գլադիատոր» ֆիլմի վրա, որի գլխավոր դերակատարը Ռասել Քրոուն էր:
