ՀՀ Տնտեսական մրցակցության պաշտպանության պետական հանձնաժողովում տեղի է ունեցել ՀՀ-ում ԱՄՆ դեսպան Ջոն Հեֆերնի և հանձնաժողովի նախագահ Արտակ Շաբոյանի հանդիպումը:
Դեսպանը բարձր է գնահատել մրցակցային իրավիճակի բարելավմանն ուղղված հանձնաժողովի գործունեությունը և ընդգծել, որ այն շատ կարևոր է ոչ միայն Հայաստանի, այլև ՀՀ-ում գործող ամերիկյան ընկերությունների և օտարերկրյա ներդրողների համար ընդհանրապես:
Հանդիպմանը ՏՄՊՊՀ նախագահ Ա. Շաբոյանը դեսպանին է ներկայացրել 2011թ. կատարված աշխատանքները՝ նշելով, որ հանձնաժողովի գործունեության տեսանկյունից նախորդ տարին եղել է բավականին արդյունավետ: Ա. Շաբոյանը դեսպանին է ներկայացրել հանձնաժողովի կայացրած որոշումների վիճակագրությունը` նշելով, որ նախորդ տարիների համեմատությամբ դրանց թիվը մի քանի անգամ ավելացել է: Ա. Շաբոյանը անդրադարձավ նաև նախորդ տարի կատարված օրենսդրական փոփոխություններին` ընդգծելով, որ դրանք հնարավորություն են տալիս աշխատելու շատ ավելի արդյունավետ:
Ջոն Հեֆերնը բարձր է գնահատել հանձնաժողովի առաջընթացը և կարևորել մրցակցային հավասար պայմանների ստեղծմանն ուղղված հանձնաժողովի ջանքերը:
ՏՄՊՊՀ նախագահը նշել է, որ հանձնաժողովը մեծ ուշադրություն է դարձնում աշխատակիցների վերապատրաստման, ինչպես նաև միջազգային փորձագետների հետ համագործակցության խնդրին, քանի որ շատ հարցերի ուսումնասիրության ժամանակ միջազգային փորձն օգնում է կայացնել ճիշտ և հիմնավոր որոշումներ:
Ա. Շաբոյանը դեսպանին տեղեկացրել է, որ հանձնաժողովը մեծ աշխատանք է տանում նաև հասարակության տեղեկացվածության բարձրացման ուղղությամբ, որպեսզի վերջինները հստակ պատկերացում կազմեն հանձնաժողովի գործունեության մասին և հարկ եղած դեպքում թեժ գծի միջոցով (010 54-40-04) իրենց հուզող խնդիրների մասին տեղեկացնեն հանձնաժողովին:
Հանդիպման ավարտին դեսպանը, կարևորելով ՏՄՊՊՀ աշխատանքը, նշել է, որ պատրաստակամ է հնարավորինս աջակցել հանձնաժողովին` առաջիկա ծրագրերի իրագործման հարցում:
Ա. Շաբոյանը ևս իր գոհունակություն է հայտնել դեսպանին` տարբեր ծրագրերի միջոցով հանձնաժողովին աջակցելու համար և պատրաստակաություն հայտնել հետագայում ընդլայնել համագործակցությունը` ի նպաստ մեր երկրի մրցակցային միջավայրի բարելավման:
