«Այսօր Արարատի և Վայոց Ձորի մարզերի դատարանի Վեդիի նստավայրում մեկնարկելու է անցած տարվա սեպտեմբերի 6-ին իր փոքրիկ երեխաներին խեղդամահ արած Ռոզա Ալոյանի գործով դատավարությունը: Ալոյանը ներկա Է լինելու դատավարությանը»,- գրում է «ՀԺ»-ն և հավելում.
«Այս մասին մեզ հայտնեց 2 երեխայի սպանության համար մեղադրյալի փաստաբան Լուիզա Հարությունյանը: Ավելի վաղ դատարանը Ալոյանի նկատմամբ խափանման միջոց Էր ընտրել հարկադիր բուժումը «Նուբարաշեն» ՊՓԲԸ հատուկ հսկողության հոգեբուժական բաժանմունքում, քանի որ, ըստ բժշկական տեղեկանքի, նա անմեղսունակ է:
Հարցին, թե ինչպես է անմեղսունակի վերաբերյալ գործը հասել դատարան, փաստաբանը ասաց` պատճառը դատախազության կողմից մեղադրանքի հաստատումն էր. «Նման դեպքերում մեղադրանքը չի հաստատվում, բայց, չգիտես ինչու, դատախազությունը Ալոյանի մեղադրական եզրակացությունն Է կազմել և ուղարկել դատարան»:
Ըստ նրա` դատախազությունը, սակայն, չի վիճարկել անմեղսունակության փաստը: Թե ինչ տեղի կունենա դատարանում, դժվար է ասել: Առաջադրված մեղադրանքով` Ալոյանին սպառնում Է ցմահ ազատազրկում»: